Paro rey de Ejipto se sonya una noche un suenyo muy trublado, i se le esmove su suenyo, i no puede dormir.
A la manyana, mando a yamar a todos los savyos del pais por ke le digan la eksplikasyon de este suenyo. I ninguno de eyos pudo dizirle una koza ke se le aresentara en el korason. I paro se determina de kitar del mundo a todos los savyos de su pais, una ves ke no pudyeron eksplikar su suenyo i para ke syerven mas? Entonses, se rekorda el grande maestro de los vinos de su suenyo i de la custa eksplikasyon ke le tuvo echo Yosef i le propoza a Paro de traerle este eksklavo Cudyo por ke le eksplike su suenyo.
Paro sin perder tyempo enkomenda a sus mosos ke se lo yeven al palasyo kon repozo ke no se aturve i pyerda su sensya i saver.
El primer diya de este anyo, diya de Roş Aşana fue yevado Yosef al palasyo de Paro por eksplikarle su suenyo. El Kriyador ke envelunto pagar una buena paga a Yosef, i enalteserlo por su custedad i onestedad i por amor de sus padres, estuvo en su ayuda i ekspliko el suenyo de Paro tal i kual sigun lo ke amostrava. İ le dyo a saver ke esto era un avizo del Kriyador ke le avizo a Paro ke despues ke tyene ke ser 7 anyos de artura i abondensa de sivera en el pais, tyene ke aver 7 anyos de una ambrera muy fuerte. İ lo konseja en mismo tyempo ke tome sus prekosyones por no deshar sufrir al puevlo de ambre. Paro a un ke se konvensyo ke esta soltura es verdadera kon todo le demanda a Yosef ke le de un sinyal ke su eksplikasyon es verdadera. Yosef le profetiza lo ke le teniya akonteser akel mismo diya i es ke su mujer la reyna le tyene ke parir un ijo. I en vista ke nase este ijo se tyene ke murir el otro ijo ke teniya aedado de dos anyos.
Vyendo Paro ke la profetizia de Yosef se afirmo, se konvensyo mas muncho de la verdaderiya de la soltura del suenyo, i konsejandose kon las grandes de su reynado, lo nomino a Yosef, Grande Ministro i patron de toda la tyera de Mitsrayim. İ le dyo todos lo poderes en su mano porke rija su governo sigun su pareser.
Yosef se asento en siya de reynado kon muncho onre. Fue kerido i amado en ojos de Paro, i de todo el puevlo. İ le dyo Paro a Asenat ija de Potifera, de la sivdad de On por mujer, entonses teniya Yosef 30 anyos.
