Los ermanos de Binyamin, i partikularmente Yeuda, el garante de su padre, no se vana kontentar tan presto kon esta grasya del podestator del Ejipto. Enpesan alora amostrar sus valor, i sus baraganiya. I Yeuda sovre todo, se mete a konvensar kon Yosef kon buenas i kon malas. I le da a entender ke kale ke se yeve sano a Binyamin onde su padre.
Alora se konvensyo byen Yosef ke sus ermanos verdadmente se vana entregar a la muerte por uno de eyos i ke esto demostra por siguro ke ya se tuvyeron repintido de lo ke izyeran kon el i no pudyendo mas suportar, se dyo a konoser a sus ermanos, kon muncho fineza i se abrasaron i yoraron de aparte aparte.
Al punto tuvo Paro avizo de esto. I los grandes del palasyo i se gustaron muncho de saver ke sus podestator i rijidor es de una famiya la mas onorada del mundo. I no es un ombre perdido o esklavo, sİgun pensavan fin agora.
Yosef les dyo regalos i dadives a todos sus ermanos para toda la famiya. I kon orden de Paro mando a sus ermanos kon karosas del palasyo onde Yaakov su padre, por azerlo vinir a Mistrayim, para ke biva el resto de sus diyas kon repozo, alado de su ijo kerida.
Los ermanos de Yosef no perdieron tyempo i sefueron todos a una yenos de alegriya i gozo onde Yaakov sus padre i sigun les enkomendo Yosef se rijeron de no darle avizo a Yaakov al punto del echo de Yosef.
Yaakov no kijo kreer tan presto sus palavras ni las palavras de sus ijos.
Pero, vyendo las karosas i los regalos ke mando su ijo, se konvensyo por siguro ke es verdad lo ke dizen i se arebivyo su korason i kovro fuersa i alegriya todos los moradores de Kenaan ke savian la ansya de Yaakov se alegraron de sintir esta buena nuvela, i les izo konbite tres diyas.
