Los miembros del grupo del Ladinokomunita fueron los primeros ke se ambezaron ke los Djudios Estanbollis asendieron la Hanukiya en la kaye. So yo ke kon grande emosyon di este haber antes de irme aya. Ay anyos ke pensava ke una noche se puede asender la hanukiya en las kayes mizmo en Estanbol. I esto era una imajinasyon. Una imajinasyon viendo las otras sivdades del mundo entero ande los Djudios asenden las kandelas de la Hanukiya en las plasas. Kuando la kaleja ke se topa serka de muestra gazeta Şalom, nomada Abdi İpekçi – nombre de un djornalisto ke fue matado por un teroristo ke atako dospues el Papa en el Vatikan i paso munchos anyos en las priziones italyanas - fue la kaye ande no fonksyona arabas i es ornada para el muevo anyo- esta imajinasyon puediya ser realizada kon el prezidente de esta munisipalidad ke lavoro munchos anyos. Ya savesh ke siertas kozas se realizan kuando es la sira (kuando viene el torno). Muesro redaktor İvo Molinas una noche dyo la idea de asender la Hanukiya en las kayes i el prezidente de la munisipalidad de Beşiktaş disho “de ke no”. I kon kontaktos djustos, los diridjentes i muestro prezidente İbrahimzadeh reusheron a organizar un evenimiento asemejante.
Kreo mas de kinyentas personas se arekojeron debasho de la meshkita de Ortaköy - meshkita fraguada kon el orden del Sultan Abdülmedjit por los arkitektos famozos Ermenis, miembros de la famiya Balyan (un grande nombre de los mas famozos edifisios de esta epoka fueron fraguados por los arkiektos de esta famiya) Garabet Amira i Nigoğos. El kuarter de Ortaköy es famozo kon su meshkita, sinagoga i iglesias (grega i ermeni) ke se topan todos en el mizmo lugar. Mizmo la poeta i eskritora Beki L. Behar avia eskrito una poezia ke empezava kon “Ezan, çan, hazan” (La sinyifikasyon es: La yamada del imam, la kampana de la iglesia i el hazan de la sinagoga) ke sinyifikava la amistad de las tres relijiones en el mizmo lugar i esta poezia fue eskrita en la plasa de Ortaköy ensima de un arvole.
Estash viendo de las fotos el efekto de la hanukiya kon la meshkita. Mizmo asperimos ke se melde el ezan antes de asender las kandelas. Dospues ke se asendio las kandelas, kitaron lo ke se topava detras de la shena (sahne) i esta vez la Hanukiya estava kon el ponte ke se topa entre dos kontinentes la Evropa i Asia. Ay siertas personas ke se akodran kuando el Prezidente Amerikano vino a Estanbol en el enverano del 2004 fue resivido en Estanbol en la Universitad de Galatasaray ke se topa serka de Ortaköy i kuando abasho del yat en kaminando verso la djentorya ke se topava el dekor era el Ponte del Bosfor; la Meshkita de Ortaköy i el Prezidente de los Estados Unidos. Los responsavles Amerikanos de esta organizasyon reelmente bushkaron muncho en Estanbol para topar este dekor empresyonante. I los Djudios Estanbullis kon poko esforsos organizaron este evenimiento ke fue reelmente yeno de emosyon para los djudios de esta sivdad i de este pais.
El prezidente de la munisipalitad, el Hahambashi Haleva, el Prezidente de la Komunidad i el rabbi de Ortaköy Nafi Haleva todos asendyeron las kandelas kon otras personas ke representavan postos emportantes. La mueven kandela fue asendida por todas las kriyaturas ke se topavan aya. I este djesto fue aprovado por la asistensia. En tornanda mizmo mujeres muzulmanas tapadas se estavan meneando kon las melodias de Hanuka ke s’estava oyendo en la plasa…
Otras munisipalidades d’Estanbol estan prontas para azer esta organizasyon el anyo venidero.
