Despues ke estuvyeron Moshe i Aaron konversando kon el puevlo de Yisrael i les dyeron a saver la desizyon del Dyo Poderozo fueron al palasyo de Paro por avizarle el komando del Todo Poderoso.
En akeyos tyempos, no era fasil a kualonke persona de entrar i topar kon Paro si ser otorizado. Pero, Moshe Rabenu sirvyendose de su vara ke le apronto El Kriyador en el monte de Horev por ke aga kon eya todos los sinyales i maraviyas entro al palasyo sin lesensya de ninguno. İ topandosen Moshe i Aaron en prezensya de Paro le avizan el komando del Dyo ke salte a su puevlo Yisrael del esklavaje i ke los mande alforiya.
Paro no tomo tan presto en konsiderasyon estas palavras de Moshe i Aaron, les dize ke los Djudyos estan muy floshos en sus lavoro, i por esto, yo les metere un buen yugo ke no tengan tyempo de pensar la salidura de Ayifto.
Paro izo apezgar el yugo de su servisyo sovre el puevlo Djudyo kon un krueldad ke no se puede imajinar.
En el enterval de un anyo, mando el Dyo dyez yagas una mas fuerte ke otra a Mistrayim.
Enprimero se trokaron las aguas del Nilos en sangre, i muryeron los peshkados del riyo. Despues se muchiguaron en el rio las ranas i salyendo despues de la agua, kavzaron munchos danyos en la tyera. Despues de konkriyo en todo el Ejipto unos piojos de una manera muy feya i muy danyosa. Mas despues arivo al Ejipto una mesklatina de unos animales krueles ke kevrantaro muncho el publiko.
Despues uvo una mortaldad terivle en las kuatropeas ke izo muncho danyo. Una feya i muy negra sarna les vino a todos los Ejipsyanos asta no pueder suportar. Despues uvo un buen pedrisko ke danyo todos los frutos del kampo.
