Yitro suegro de Moşe Rabenu, tuvyendo avizo de todo lo ke paso dizde ke salyo el puevlo Djudyo del Ejipto, i todos los milagros ke izo El Kriyador a los Djudyos por mano de Moshe Rabenu, tomo a Tsipora su ija mujer de Moshe Rabunu i a sus dos ijos Gerşom i Eliezer. I se fue para el dizyerto al monte de Horev por verlo a Moshe Rabenu i ayegarsen kon el i saver todos los pasajes en detalyo.
Arivando al monte de Horev, mando avizarle a Moshe de su vinida. Tuvyendo avizo Moshe Rabenu de la vinida de su suegro, salyo al punto de Refidim a su enkuentro, el i todos los grandes personajes de el puevlo Djudyo. I lo resivyo kon muncho respekto i le izo las onores meresidas. I le konto todos los pasajes en detalyo dizde el diya ke se espartyo de el fin este diya.
Yitro se alegra muy muncho de sintir todo esto, i bendisho al Kriyador rekonosyendolo por sinyor de todo el mundo, i resivyo sovre si de Kreer en el solamente i guadrar sus enkomendansas, i kedo en el dizyerto kon Moshe Rabenu.
Despues de un mez i medyo ke salyo el puevlo Djudyo del Ejipto en el primo diya del mez Sivan, partyeron de Refidim i arivaron al dizyerto de Sinay, i pozaron enfrente del monte Sinay en este luguar deklara el Todo Poderozo al publiko por boka de Moshe Rabenu, ke El Kriyador eskojo en este puevlo komo un trezoro, vozotros vitesh muy byen dize El Kriyador. Lo ke ize por vozotros a las Ejipsyanos, i ke vos trushe asta aki kon muncha siguridad, komo sovre alas de agilas, i agora, si vozotros keresh ovedeser mis ordenes i konservar mi firmamyento kon vozotros, de ser mi puevlo fidel, alora vozotoros seresh konsidirados mu trezoro. I me Seresh muy keridos, ma a kondisyon ke devesh ser una nasyon de Koanim (servitores del Kriyador) i un puevlo santo. Sintyendo estes palavras el puevlo, de boka de Moshe Rabenu, respondyeron todos a una kon el mas grande antuzyasmo. “Todo lo nos enkomendo El Kriyador vamos a ovedeser”
Ansi vemos en la peraşa el deklaramyento de los aseret adiberot, los dyes komandamyentos.
