Kada mez en El Amaneser tenemos una oja preparada por el Sinyor Michael Halevy. Es djusto ke estas informasiones son sientifikas ma no da bastante konosensya al lektor. Ya se ke no es muy fasil de vender livros en Judeo-Espanyol. No son puede ser los best-sellers de la literatura ma devemos de azer mas munchos esforsos para ke los interesantes tengan haber de todo modo de livros, CDs audio i mizmo filmos sovre la lingua i la kultura sefaradi. La lingua ke es el Judeo-Espanyol. Mizmo devemos de informar muestros lektores sovre las tezes de universidades publikadas i non publikadas. Savemos ke sin topar apoyo finansal no es muy fasil de imprimar tezas de universidad.
Muestro Sentro esta pronto a publikar mizmo tezas de universidad si el sujeto le enteresa. Por esta razon puedesh kontaktarmos i proposar lo ke keresh.
Siertas personas ke estan publikando livros se estan keshando ke no se esta vendiendo en Estanbol. El livrero (kitapçı) ke se topa en el Şalom i ke es enkavesada por la Sinyora Gila Erbeş mizmo si no publika bastante livros esta dando al enteresado todo modo de livros en turko, en inglez, en fransez, en Judeo-Espanyol, mizmo en otras linguas si egzisten. El segundo lugar ande se vende livros es la botika ke se topa en el Muzeo Djudio en la partida atras del Neve Şalom. Kreo ke en poko tiempo kon los esforsos ke se estan aziendo, munchos turistos turkos i estranjeros van a vijitar este muzeo i su botika ande se vende livros i objektos.
A todos ke publikan livros, CDs i todo modo de filmos, les rogo de embiyarmos a lo manko un egzemplo a muestro Sentro de Investigasyones Sovre la Kultura Sefardi ke se topa en el mizmo adreso ke el semanario Şalom. Este modo vamos a topar la posibilidad de azer konoser al muestro lektor esta ovra. I el segundo punto va ser ke esta publikasyon va topar lugar en muestra biblioteka. Este modo los lektores kuando mos van a demandar estos livros vamos a pueder merkarlos i venderlos.
Trenta i sinko anyos antes kuando empesi mi mision en el Şalom komo redaktor; a lo manko en Turkia no se publikava livros sovre el Djudaismo i la Kultura Djudia i Sefardi. Ma poko a poko tuvimos un trokamiyento i se empeso a publikar un alay de livros ke tuvieron sukseso o no. Ma el lektor tuvo la posibilidad de pueder meldar livros konsernando temas djudaikas i munchos romansos (roman). Savemos ke en esta epoka se publiko munchos livros de ley kon transkripsyon del ebreo a letras latinas; i lo mas muncho kon traduksyon en Turko. Ya se ke esto no es el sujeto de muestra revista ma esto es las frutas de este trokamiyento.
Esto insistiendo ke devemos de anunsiar todo modo de publikasyon publikada en kada lingua (bulgaro, aleman,…) mizmo devemos dar al lektor la posibilidad de merkarlos en sinyifikando komo se pueden merkar. Oy en dia el transporto para un livro komo es karo, puedeser devemos topar remedios para embiyar sinko o dies livros en una vez.
Estamos asperando kon emosion egzemplos de los livros publikados.
El e-mail del Sentro es : [email protected]; telefono: +90 212 2319282
