Es el 15 del mez de Mayo en la Grande Sinagoga de Andirne ke vamos a bivir un evenimiento ekstraordinaryo. Una semana antes todos los oteles son yenos en esta sivdad porke se va selebrar la fiesta de Hıdrellez. Hıdrellez es el empesijo del enverano, i se fiesta en munchas partes del mundo i en los Balkanes. Los romanos (zinganos) son uno de los puevlos ke selebran esta fiesta kon munchos evenimientos ke son un materyel eksepsyonel para los ke travan fotografias.
Una semana dospues es la semana de las fondasyones. Kon este preteksto la Komunidad Djudia de Turkiya esta organizando un konserto muy enteresante en la Sinagoga. Puedeser konosesh al muzisyen de klarinet el Maestro Giora Feidman ke selebro sus ochenta anyos la semana pasada i ke es uno de los mas famozos muzisyenes ke interpreta la muzika klezmer. Por los ke no lo konosen es muy kolay de demandar al Profeta Google ke vos kante una de sus interpretasyones en el YouTube. Ke no vos pareska ke es solo el ke mos va kantar i tanyer. Tiene un trio kon akordeon, perkusion i otros instrumentos. En el mizmo konserto vamos a tener un otro muzisyen de klarinet turko ke se yama Serkan Çağrı. En el libretto de su konserto dalkavo estava eskrito lo ke pensa Giora por Serkan: “Esta empesando su kariyera muzikala en el nivel ke yo esto oy en diya”. Antes de organizar este konserto me fui a una nochada de muzika ke tuvieron endjuntos kon el violonisto famozo Hungaro Roby Lakatos. Reelmente fue una nochada ke todos los spektatores tomaron plazer de sintir estos dos muzisyenes. I este modo kuando propozi al maestro Feidman de tomar la shena kon el sinyor Çağrı el acheto immediatamente. Es siguro ke los dos van a estar en la shena kon sus trios i kuartetes. Reelmente no fue muy kolay de organizar este konserto.
Komo puedemos finansar un konserto semejante? En otra sivdad. En transportando sienes de personas? Ay solo una posibilidad: de topar kompanyias komersiales ke van ayudar esta aktivitad kultural. I el evenimiento se esta realizando de esta manera. Estamos pensando mizmo de transportar la djente si keren kon otobuses de la demanyana, si keren despues de midi kon un transporto Vip.
I ke pensamos de azer dospues del konserto? Antes de tornar a Estanbol vamos a dar un pranso – kokteyl prolonje – kon ligado kasher gizado por los Edirnelis.
Todo se puede organizar. Esperamos ke todos los evenimientos malos ke son pensados por las personas “negras” no se van a realizar i vamoa a organizar este evenimiento kon grande plazer.
Si keresh partisipar a este konserto vash a topar la posibilidad de rezervar vuestro lugar en una o dos semanas kon los anunsyos ke van apareser en el Şalom o en vuestros e-mailes o mesajes de telefon.
