Kon el nombre del Dyo tornimos sanos i rezyos de Amsterdam. Ma kero dizir ke aya estava mas sano ke otras sivdades. Dospues de los Estados Unidos es kreo el segundo pais ke metyo en el aeroporto un instrumento ke esta viendo lo todo ke las personas tyenen; mizmo las paras en la aldikera. Dospues ke reushi a pasar sin bruido, el kargado de la seguridad me demando si me puede bushkar ensima. Le respondi “si” porke no puediya darle una otra repuesta. I me demando lo ke tenia en la aldikera. Le respondi i le amostri ke tenia paras. Mizmo las paras ke tenesh en la aldikera se esta viendo kon este instrumento.
Entre unos kuantos muzeos ke vijiti tuve la posibilidad de vijitar la Sinagoga Portugesa de Amsterdam ke es aklarada de noche solo kon kandelas i no es kayntada kon kalorifer. No se emplea elektrisidad en esta sinagoga i si la vijitash (la vijiti por la tresera vez i kada vez los lugares vijitados eran diferentes.) vash a tomar un grande plazer. Es avyerta dias de Shabat para la orasyon de Shabat. Reelmente es una sinagoga fraguada en el disejen siglo i oy en diya el edifisio es fraguado en una superfisia de mas de mil metros kuadrados (m2). Disyete anyos antes no se topava los lugares de ekspozisyon ke son en las salas ke se topan en el budrum de la guerta. Topamos aya un alay de objetos ke fueron empleados en la Sinagoga. En la Sinagoga i en el Muzeo se da apareyes audios ke fonksyonan en aserkando el aparey al punto determinado. I kuando vesh una vetrina yeno de objetos devesh de aserkar vuestro aparey a la indikasyon ke se topa en el vitro i puedesh oyer lo ke keresh en la lingua ke preferash. Reelmente izyeron un sistem muy simple. Espero ke puedemos tener un sistem asemejante en muestro muzeo.
En lo ke oyi se estava avlando en el aparey audio de una sinyora Miriam Knauter ke es una konservatora i ke se okupo de las mapas i de los parohet antiguas de la sinagoga. Es en İzmir ke me ambezi ke estavan lavorando kon siertos akademikos finlandezos ke son ekspertos de parohet i mapas - tekstiles antiguos. I mozotros Djudios de Estanbol devemos lavorar kon personas ekspertos en este sujeto. Savemos ke muestra komunidad poseda munchos parohetes i mapas ke tienen menester de ser konservadas en buenas kondisyones.
I el muzeo. Lo avia vijitado en el anyo 1999; ma una grande partida fue trokada. Tengo un livro merkado ke lo meldi, por la primera vez antes de ir me una otra vez a Amsterdam. Era muy influensado por lo ke los Djudios de este pais avian echo para la ekonomia del pais. Era ekspozado todo modo de objetos ke fueron produsidos por los Djudios de este pais por la primera vez. I avia pensado deke no amostramos la primera karucha ke fue realizada por el Sinyor Rafael Torel i ke se topava en las uzinas ke se topava. Las bataryas antiguas de Berec-Kivi ke dio mizmo el nombre al kuartier ke se topava. Los primeros postos de televizyones ke fueron produsidos por Profilo, Grundig, Telefunken … todos industriyales Djudios de muestro pais. De ke no se topa en el muzeo las esharpas i mizmo las kravatas produsidas por la Kompanyia Vakko i su propriyetaryo el Sinyor Vitali Hakko. Tenemos reelmente munchos industriales ke realizaron munchas kozas para sus pais produsiendo siertos artikolos. Si vamos a tener un espasio mas ancho en muestro muzeo reelmente devemos dar lugar a estos artikolos.
De una parte esto muy kontente de eskrivir mis artikolos en Judeo –Espanyol ma de la otra vanda no esto muy kontente porke los lektores ke deven de meldar estos artikolos no konosen bastante esta lingua para respektar i puedeser aplikar estas ideas.
Malorozamente en las botikas de la Sinagoga i del Muzeo se topa un alay de artikolos, livros i CDs ma malorozamente no topamas CDs orijinarios de Turkiya ke son reelmente egzemplios muy importantes de la Kultura Sefardi. Ke no vos pareska ke los muzeos Djudios son los lugares los mas importantes de Amsterdam. Ya tenesh la posibilidad de vijitar mas de kuarenta i kuatro muzeos en est sivdad. Kero eskapar en avlando sovre la populasyon Djudia del pais. Antes de la Segunda Gerra Mondial avia serka de sesenta mil Djudios en esta sivdad. Malorozamente una partida fueron matados (komo Anne Frank) en los kampos i una partida desharon la Olanda i se fueron a otros paizes judios ma devemos de indikar ke los trenta por syen son Israelyanos ke biven en este pais.
No vos kero kontar las difikultades ke bivimos para vijitar la Kaza de Anne Frank. Vos va dizir solo ke una ajensia de bilyetos de muzeos mos disho ke no tienen la posibilidad de vender bilyetos para la Kaza de Anne Frank porke no tienen menester de personas ke venden por eyos.
