Kada anyo es en la Sinagoga de Neve Şalom ke komemoramos el Yom Ha Zikaron i ke selebramos el Yom Hatsmaut. I es despues de un o unos kuantos dias ke se sel-ebra la fondasyon del Estado d’Israel en un otel de sinko estreyas en Estanbol, or-ganizado por el Konsulato i en Ankara organizado por la Ambasada Israelyana.
Este anyo lo selebrimos en otra manera. Lunes la noche estavamos envitados en el Sentro Zorlu ande se realiza konsertos i performansas artistikas. Kreo ke es una de las mas grandes salas de muestra sivdad. El kokteil ke duro serka de dos oras se realizo en la parte de detras de la shena. Un lugar ande kavyo kreo mas de tresyen-tas personas.
I todos estavan demandando si vamos sintir la kantadera sin asentarmos. Va ser reelmente una pena esta envitasyon. Los tratamyentos eran de regalar. Es la sinyora Vivet ke mos esta organizando la komida i el kokteyl del konserto ke vamos a re-alizar este alhad en Edirne, ke aparejo todo i estava una maraviya. Aviya muncha djente ma kreo ke la mas grande partida eran miembros de muestra komunidad. Avlimos i tuvimos el plazer de ver siertas persons ke renkontramos un vez al anyo.
Dospues se alevanto la kortina (perde) i vimos el salon de konseres de Zorlu. Pasi-mos a la otra parte de la kortina i mos asentimos en los fotolyos. Reelmente es uno de los mas luksuozos salones de konserto en Estanbol.
Dospues ke el Konsul Jeneral, el Sinyor Shai Cohen mos avlo sovre el aniversario del Estado de Israel sintimos los imnos nasyonales de la Turkiya i de Israel. Era por la primera vez ke tuve la posibilidad de sintir la kantadera Israelyana ke kanta djaz. Se yama Ester Rada. Es una kantadera ke vino unas kuantas vezes a muestra sivdad i dyo konsertos en Babilon i İş Sanat. Es muy renomada en Israel i da konsertos en Los Estados Unidos i otros paizes. Mizmo toma rolos en los teatros. Por los ke aman la muzika djaz este konserto reelmente fue muy apresiado. No se la opinion de los ke no aman este djenero de muzika. Fue puedeser una mala ora mizmo si te-nian la posibilidad de fuyirsen sin ser remarkados. Espero ke esta selebrasyon va ser el empesijo de la mueva perioda de las relasyones Turko Israelyana. Estamos esperando de ver las buenas relasyones ke bivimos dospues de los ‘90.
Muestro dover es de partisipar a la seremonia ke se va realizar esta noche en el Neve Şalom.
