Ay dos o tres semanas ke las noches me estava espertando kon eshuenyo negro sovre el konserto ke deviamos de realizar en la Sinagoga d’Andirne el 15 del mez de Mayo.
Teniya siertos dubyos. Ay un anyo i dos mezes ke este edifisyo despues de ser restorado i ke fue inogurado para servisios por la segunda vez. I vos kero dizir ke serka de syen mil personas vijitaron este edifisio de una grande valor. Izimos todo el menester para ke una ekspozisyon de fotografiyas, de gravures, de pintura o de otro modo de arte sea ekspozada durante estos katorze mezes. Estamos aziyendo siertos esforsos para avrir un Cafe i un Suvenir Shop en el midrash de la Sinagoga. Este modo, los ke estan vijitando esta sinagoga van a topar la posibilidad de pasar mas muncho tiempo en la sinagoga, en la ekspozisyon i en otras aktividades.
Dospues de un lavoro loko ke fue realizado kon un alay de djente dos diyas tuve la posibilidad de estar en Andirne. Reelmente los sivdadinos de esta sivdad son muy amavles kon los djudios. Ya se ke siertos tiempos tuvimos diferentes problemas, mizmo siertos muy emportantes; ma malgrado esto, oy en diya no sintimos la mizma koza. Organizar un konserto de kualidad alta enternasyonal - kon artistos ke dan konsertos en las mas emportantes sivdades de la Evropa i de las Amerikas – en una sivdad ande no es posivle de topar todo los menesteres, reelmente no es muy fasil. Kale achetar ke Andirne se topa en una distansya de dos oras i medya d’Estanbol i si vuestro echo se topa en Hadımköy komo mi, tenesh la posibilidad de alkansar en una ora i medya esta sivdad komo lo ago de vez en kuando.
Despues del lavoro de un grupo de personas; shabat por la noche, tuvimos el plazer de resivir el Maestro Feidman en Andirne; reelmente todos lo topimos muy amavle. La mas grande partida de los amantes de muzika son prontos a dar munchas kozas para ser endjuntos kon una personalidad komo Giora. A la demanyana mos fuimos a la Sinagoga i kijo tornar al Otel para tomar su klarinet para su orasyon. Tornando tuvimos el plazer de oyer el Maestro Giora djugando su klarinet en frente del Ehal ha Kodesh. I todos filmimos kon los telefonos estos momentos yenos de sentimentos. Un amigo ke embiyo esto al “facebook” fue segido mas de sesh mil vezes. Reelmente es inkreivle. El sinyor Feidman kompozo una kantika kompozada de dos imnos nasyonales: turko i israelyano. Una linya del “İstiklal Marşı” (İmno Nasyonal Turko); una linya de la “Hatikva”. Antes del konserto yamo a muestro prezidente de la Komunidad, el Sinyor İbrahimzadeh para demandar su opinion. I el le dyo su opinion pozititiva… Kuando empeso a djugar esta kompozisyon muzikal, mas de tresyentas personas se alevantaron para sintir. (En Turkiya kuando se oye el imno nasyonal, no se toma ni reflo i se kanta kon grande emosyon). En el konserto teniamos un otro artisto muzikal, el Sinyor Serkan Çağrı, ke reelmente mizmo ke es mansevo tiene un grande talento para djugar su enstrumento: la klarinet. En la primera partida es el kon su grupo ke mos kanto siertas kantikas entre eyas mizmo “Los Bilbilikos”; i yamo el Maestro Giora a la shena alavandolo. I tuvimos el plazer de oyirlo un ora kon grande plazer. Mizmo reusho a azermos kantar. Es kon “Dona dona” i “Yerushalaim shel zahav” ke la Sinagoga d’Andirne bivyo los anyos sinkuenta i sesenta ande la sivdad teniya una Komunidad bastante grande.
Kreo ke la mas grande partida de los ke tomaron lugar en esta nochada fueron enkantados. Ya se ke no es muy fasil de ir i vinir tres oras kon buses mizmo kon arabas. Por esto antes de saludar los partisipantes, antes de sus partensyas; les ofrimos un pranso kon ligado frito (ciğer tava) ke es una spesialidad de esta sivdad kon albondigas (koftes) i sarsicha (sudjuk) asado en el brazero (mangal). Al lado diferentes salatas preparadas de una manera muy prezantavle.
Espero ke esta Sinagoga va ser el lugar de munchos otros konsertos …
