En enverano si bivesh en las Islas i si sosh ovligados de eskrivir munchas noches artikolos para el Şalom o para el Amaneser, los vizinos vos demandan lo ke estash aziendo kada noche kon el kompyuter. Es muy yuch de dar a entender ke noche de alhad eskrives un artikolo para el Amaneser para no komer furcha de la patrona Karen ke tyene syempre “adjile” i ke demanda el artikolo vente diyas antes ke apareska. I kada lunes devo de eskrivir un artikolo para el Şalom i devo de ser en regla kon mi patrona Klara Perahya. Reelmente aze todo en regla i kere ke kada artikolo sea pronto en su tiempo.
La semana pasada avlimos un poko sovre la tentativa de la revolusyon ke bivimos i kreo ke fue organizado por un grupo de relijiozos ke tienen sus kapos en los Estados Unidos. Reelmente la mijor manera de dirijar un pais es la demokrasia ma si no es influensada por otros faktos. Anyos enteros tuvimos relasyones amikales kon este movimyento ke tenia komo buto “el diyalogo entre las relijiones”. I izieron un alay de konferensias, kolokes, kongresos i todo modo de aktividades para ke todo el mundo sepa ke la relijion no es muy importante i el diyalogo entre las personas de diferentes relijiones puede tener diyaloges muy pozitivas. I la mas grande partida de los partisipantes estavan entontesidos kon estas aktividades. I avia siertas personas i siertos diridjentes ke tenian un suspecho; un dubyo sovre este movimyento.
Ma esto siguro ke dingunos no pensavan lo ke realizaron la noche del 15 Julio. Este grupo kijo azer una revolusyon! Ma no savemos kualo pensavan azer dospues. Puedeser formar un konsilyo de administrasyon ke va desidar ke la Turkia sea diridjada komo el Iran de los ochenta kon un ombre relijiozo en el poder. La Turkiya es un pais ande muncha djente son relijiozos i es el pais ande se topa lo mas muncho de meshkitas. Ma esto no kere dizir ke el puevlo turko kere una administrasyon ke desida sovre la ley muzulmana. El puevlo kere la demokrasia sin alesharse de la relijion. Reelmente no es muy fasil de entender el modo de vida del puevlo turko. Oy vemos mizmo en Iran ke la administrasyon i el puevlo keren mas munchos derechos de libertad mizmo si tienen un rejim islamiko.
Los evropeos pensan kel islamismo i la demokrasia son kozas kontraryos ma kreo ke muestro pais es un egzempyo para nyegar esta teza. Espero ke muestro pais va ser el mijor egzempyo para la demokrasia en los paizes ke tienen una majorita muzulmana en sus populasyon.
