Fyestimos el Sukot

Metin DELEVİ Judeo-Espanyol
3 Ekim 2018 Çarşamba

Durante el festival de Sukot, la Suka es destinada a ser muestra kaza. Por egzemplo, komemos normalmente en kaza ma en Sukot devemos komer en la Suka. Por modo ke la Suka es pasajero, bivir una semana en la Suka demanda deshar algunas de muestras komoditas materiales, konformarse kon nesesidades mas bazikas, kreando en esta manera un derredor mas espiritual.

En muestras “mini-kazas” espiritualmente amejoreadas, la tradisyon djudia de ospitalidad i de envitar adjusta una dimensyon kompletamente mueva. No solo invitamos a amigos i vizinos a adjuntarsen a mozotros, sino ke tambien egziste la kostumbre de envitar a los grandes personajes istorikos djudíos ke dyeron forma a muestro puevlo.

Esta kostumbre se konose komo Ushpeezin (la palavra aramea para los invitados).

Sigun la kabala, la tradisyon mistika djudia, la Shehina (Prezensya Divina) akompanya a kada djudio en la Suka. La Shehina esta akompanyada por los syete pastores de Israel: Avram, Izak, Yaakov, Moshe, Aaron, Yosef i David.

Kada noche, el balabay da la bienvenida a los syete ushpeezin (invitados) a la Suka dizyendo: “Invito a mi komida a los invitados eminentes: Avram, Izak, Yaakov, Moshe, Aaron, Yosef i David. Ke te gustes, Avram, mi eminente invitado, ke todos los eminentes invitados estan aki kon mi i kon ti: Izak, Yaakov, Moshe, Aaron, Yosef i David. (1)

Kada noche, otro de los Ushpeezin es bienvenido, en un orden spesifiko. Asi, en la segunda noche, el balabayit dize: “Ke te agrade, Izak mi eminente ...” En la tresera: “Ke te agrade, Yaakov, mi eminente ...” i asi suksesivamente a lo largo de la semana.

(1) El orden de Ushpeezin puede trokar sigun la komunidad.

 

 

Siz de yorumunuzu yapın

Tüm Yorumları Görün