Ya izo bastante ke no azemos moabet kon el lektor. Frankamente, no tengo en la idea una koza enteresante mas ke azer un poko de moabet i puede ser a la okazyon, unas, dos kritikas. No me plaze kritikar afilu si no esto syempre de la mizma idea del de enfrente. De sorte ke no diskuto muncho para konvenserlo… Naturalmente, esto no kere dizir ke yo troko de opinion. Simplemente prefero no insistir. La sola koza ke me dezrepoza es el safek de azer yerros importantes kuando avlo o eskrivo.
Porke ize esta introduksyon? Kaminando i avlando! En estos ultimos anyos, por siguro los lektores remarkariyan ke eskrivi bastante sovre Estambol, i Galata en partikolar. A tal grado ke una amiga se takileyo kon mi dizyendome: “Coya, me parese ke ya eskrivites tanto por Estambol, ke ya puedes kitar un livro sovre esta sivdad!” Siguro, era shaka.
Ay sujetos ke egzijan una bushkidad seryoza i intensa. Sin alavarme, puedo afirmar ke so muy metikuloza i miro a evitar yerros espesyalmente istorikos. Portanto, malgrado esto ya afita ke ago yerros. Estambol es un sujeto ke demanda bushkidades ondas, seryozas i ya egzisten bastante lavoros seryozos sovre esta sivdad, eskritos por istoryanos i autores selebros.
En uno de mis artikolos pasados, nombri el Imperio Bizantino i el Otomano ke suksedo. Eskrivi por Binyamin Tudela ke fue el primer viyajador del Oksidente a ir asta la frontiera de China. Vino tambien a Constantinople para ambezarse sovre la vida de los djudios de la epoka. Fue ansi, kon una asosyasyon de ideas ke pensi a Marco Polo. El tambien fue un viyajador ilustro kon sus viyajes a los paizes asiatikos i espesyalmente la China ande estuvo un largo tyempo. Vijito tambien Constantinople.
Bueno, egzaktamente en este punto aviya remarkado un yerro en un manadero muy seryozo. Esta dizyendo ke Marco Polo estuvo en Constantinople en el anyo 1250 i empeso al komercho de espesyas en Galata. Esto es yerrado syendo ke Marco Polo NASYO EN 1254! Es egzakto ke el, en su retorno a Venezia de los viajes ke izo en los paises Asiatikos, partikolarmente la China, estuvo de pasaje en Constantinople verso la fin del 13. Siglo.
De otra parte, tambien es egzakto ke los “Ermanos Polo”, el padre i el tiyo de Marco aziyan merkansiya kon el Oriente. Ansi aviyan echo fama i grande fortuna en Constantinople. Myentres la epoka de konfuzyon i pletos ke reynavan en el Imperio Bizantino, los ermanos Polo vendyeron lo ke posedavan para pueder investirlo en pyedras presyozas. Estos eventos deven koensidar kon la epoka ke vinyeron los Genovezos a Constantinople i fondaron sus Koloniya en Galata...
El buto de este artikolo es, avlar de los yerros ke puedemos azer mozotros los amatores. Asta agora no estava sigura ke titolo dar al teksto. Ansi lo topi! Me embezi ke no kale syempre fiarmos a todas las informasyones del Internet. Komo ke esto sintyendo protestos de syertos lektores. Es solamente un chiko akavido, bazandome sovre mis eksperyensas. Por esta razon miro de bushkar i otros manaderos i meldo bastante.
Tengo echo yerro de data en mi artikolo sovre la primera aparisyon del “Şalom”. El anyo 1947 syempre lo supe, porke fui personalmente testigo de los esforsos del Sr. Avram Leyon (de b.m.). Eramos vizinos i se frekuentevan muy bien kon mi padre. El yerro miyo fue de eskrivir 20 Oktobre al lugar de 29. Oy en diya me syento konfuza kuando me lo akodro. Ma, kreevos keridos amigos, yo akeya data de 20 Oktobre la tomi de un artikolo sinyado de un nombre muy siguro. Munchas vezes pensi ke esta persona no se pudiya yerrarse a tal grado. Konklui ke deviya ser un yerro de emprimeriya de la revista ande lo meldi. Mi kulpa fue de no kontrolar. Esto kedo una lisyon para mi.
