30 Kasım 2021 Salı 22:12

Una vijita a dos ekspozisyones

Dora TREVES Judeo-Espanyol 2210 görüntüleme
24 Ekim 2018 Çarşamba

Keridas i Keridos,

Ay buen kadar de tyempo ke no vos pude eskrivir. Munchas ekskuzas.

Oy vos kero kontar sovre dos ekspozisyones ke vijitimos kon mi ija en el “Diya de madres i ijas”. Las dos endjuntos mos fuimos a Tophane-i Amire ke se topa en el sentro de Tophane, serka de Karaköy. Este batimento agora apartiene a la Universita Mimar Sinan. El tyempo estava maraviyozo, komo se dize “komo limonata”.  En el mezmo lugar en la entrada aviya la ekspozisyon de la famoza artista Arzum Onan Aslantuğ. Eskulturas de mujeres dando un mesaje donde kijo enfatizar (vurgulamak) el rolo de la mujer en la komunidad.

Despues suvimos una eskalera de pyedras ke mos yevo a la ekspozisyon de la Koleksiyon de tablos de Arkas sovre el sujeto de Post-Empresyonizm.

El salon estava yeno de djente. Un grupo de estudyantes de arte viniyeron kon sus profesores. Una profesora mos ekspliko en rezume lo ke sinyifika post-empresyonizm. Una ekspozisyon maraviyoza ke mos empresyono muncho. Syertos famozos pintores komo Maurice de Vlaminck kon su tablo El Porto, Louis Anquetin kon su pintura La Mujer kon el Paraplui, Renoir kon el Portre de Madame Thurneysien, Felix E. Vallatton kon su Nature Morte, Henri Martin kon su Otoportre i kon el Portre de Madame Alice Tissier. I munchos munchos otros famozos artistos pintadores.

“Para kompletar una pintura me puede tomar solo dyes minutos ma para reushir me tomo sesenta (60) anyos” es la famoza dicha de Renoir.

Estanbol, malgrado ke mos aze kansar kon su djentorya, kon su telash de la vida, este modo de aktividades de arte mos aze repozar i mos alivyana el efekto negativo del puerpo i del korason.

Keridos lektores, i vozotros mira ver de salir de kaza i andarvos a ekspozisyones, konsertos, kaminar sin buto en las kayes, pyedrerse en la sivdad, travar fotos, suvir a un otobus i ir fin a la estasyon de alkavo i ver lugares ke no konosimos antes. La sivdad es tanto grande ke no se puede eskapar de kaminar ni en diez anyos.

Kale bivir el momento antes ke no sea muy tadre.

Al vermos.

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın

İLGİLİ HABERLER

İLGİNİZİ ÇEKEBİLİR

Şalom TV Şalom Spotify'da GZ

MOZOTROS AİLESİ - İrvin Mandel

MOZOTROS AİLESİ - İrvin Mandel

TÜNELİN UCU - İzel Rozental

TÜNELİN UCU - İzel Rozental