Un objeto ke aparteniya a Marilyn Monroe se va vender en una subesta (açık arttırma). Uno de los admiradores fanatikos de la artista va pueder merkar este artikolo ke es un livro de orasiones, un sidur.
El livro se publiko en el anyo 1922. La subesta va tener lugar en el 12 de novembre en Cedarhurst, Long Island. El presyo inisyal va ser $ 4,600.
Monroe se konvirtyo al djudaizmo en el anyo 1956 antes de su kazamiento kon el eskritor djudio, Arthur Miller. Mezmo ke se kitaron sinko anyos despues, Marlyn Monroe disho ke eya no va deshar el djudaizmo.
El rabino Robert Goldburg en New Haven, Connecticut, ke izo su konversion i su boda kon Arthur Miller, disho ke Monroe le disho ke eya se dediko a ser djudia.
Un amerikano djudio ke agora esta biviendo en Israel, aviya merkado este sidur de la kaza de Marlyn Monroe en el anyo 1999. Agora disho ke el esta vendiendo este livro al nombre de la artista.
Monroe aviya meldado el sidur munchas vezes porke en el livro ay notas eskritas en su mano.
El marido i mujer ke aviyan adoptado Marlyn Monroe en su chikes, eran Kristianos konservativos. Monroe aviya dicho ke no le plaziya el kristianizmo. Eya se konvirtio al djudaizmo antes de su kazamiento en junio kon Arthur Miller. La artista estudio el djudaizmo kon el rabino de Miller, Robert Goldburg. Goldburg aviya dicho ke el se akodra de sus lisyones kon la artista: “Eya disho ke estava empresionada del rasionalizmo en el djudaizmo, i del konsepto de la vida familiar serkana. Marilyn no era una persona entelektual, ma era sensera en su dezeyo de ambezar. No se puediya konsentrarse en la lisyon muy largo tiempo. Ma entendiya i akseptava los prinsipios del djudaizmo’.
Monroe paso una chikes muy doloroza porke su madre teniya una hazinura mental. Por esta razon, kuando se kazo kon el eskritor, se sintyo muy serka a la famiya de Miller ke eran muy atados los unos kon los otros. Estava muy kontente de ser djudia porke estava viendo el djudaizmo komo una forma de abrasar la famiya. Eya keriya tener una famiya fuerte ke no se iva derrokar.
En el filmo ‘Becoming Jewish’ (Azerse djudia), la artista teniya una menora muzikal. La madre de Arthur Miller le aviya dado esta menora despues de la konversion. La muzika de la menora era el imno nasyonal de Israel. Todo tiempo, la artista metia esta menora enriva del mantel de su meza.
