El famozo eskrivano Fransez Corneille, tiene dicho: A la persona ke save emplear el diya kon echos provechozos, la verdadera felisidad viene oras de tadre. Esta dicha puede ser no tyene algun raporto direkto kon el sujeto miyo de oy. Ma, me plaze por su sinyifikasyon i el mesaje ke kontiene. Kualo es optimismo? Ken es optimisto? No se komo dar una definisyon neta, prechiza, ma va prevar...
El optimismo yo lo entiendo komo un dono. Es una dispozisyon del meoyo, del korason, de la persona, dandole la konviksyon ke, finalmente lo bueno va triumfar sovre lo malo. Es una tendensya a ver syempre el lado pozitivo de los evenimyentos, de las personas... Es komo tener konfiensa en la reushidad, konfiensa en si propyo. Kijo dezir ke el optimisto mira a la vida de una ventana afirmativa. En todo kavzo no kale mesklar esta nosyon kon un djugo kontinual de “Pollyanna”!!”
No kero absolutamente dizir ke se deve todo el tyempo mirar kon entojos de lunas “roz”. Esto es yerro. Yerro tambien, no ver las mizeryas, los problemas de otros.
Penso ke el optimisto es korajozo, piadozo i altruisto. Se rende kuento de las difikultades suyas, ansi ke de las del d’enfrente. Bushka remedyos de ayudar, de dar apoyo moral de konsolar.
No se si enteramente reushi a eksprimir mi idea. Espero ke si... Devo dezir ke esto agora, en una de las ralas vezes ande me siento en difikultad de topar las ekspresyones o byervos egzaktos. Komo lo dishe el optimismo es un dono, una fakultad. Es tambien una partikolaridad rezya de la persona, una kapachidad. Puedo pretender ke so muy kompetente en este domeno (sin falsa modestiya!)... So muy seryoza en afirmando esto. Es mi kreensa pozitiva, ke fue, i es oy en diya, mi fuersa moral en la vida. Syempre pensi ansi: “Kualas ke seyan las deziluzyones de ayer, oy tenemos muevas esperansas.
En terminando este artikolo, kero transmeter un mesaje anonimo ke tengo tomado antes muncho tiempo: “Syendo un miembro de la populasyon aedada, oy demanyana me sinti orozo de pueder alevantarme de la kama... Kontente de tener un techo sovre mi kavesa... Kontente de pueder meldar mi primer e-mail del diya... Kontente de ser kapavle de emplear el klavye de mi komputadera...”
Keridos lektores, estas frazas no son miyas. (Aun ke i yo syento lo mizmo) Son propozitos de una persona de 84 anyos... No se si ay mas menester de komentaryo, ke dizish?
