Gizar kon kerer. Salud i Beraha

Anet PASE Judeo-Espanyol
7 Kasım 2018 Çarşamba

Keridos lektores. Vos kero akodrar un poko de las komidas sefaradis. Ya savesh ke a los mansevos al lugar de demandarvos komo se apronta una komida, les esta konvinyendo mirar el YouTube. Si no, en los marketes ya ay un monton de kozas prontas. El otro dia renkontri en el market bokales prontos de sumo de karne, de gueso o de gayna. Pastorizado. Dos mezes puede estar en el market sin frijider. Yo kavesa de vieja. Esto es saludozo? Vos esto demandando?

Vos kero un poko akodrar del livro “İzmir Sefarad Mutfağı” i el livro  “Sefarad Yemekleri”. Gizar kon el tiempo. Mupak de invyerno. Kolay i livyano ke vos seya. I el empleyo i el gizado. Agora vamos a prontar una supa de puli. Una supa ke es de buen provecho para las kreaturas i para mozos para no azermos hazinos. 

Los Ingredientes:

卦 kg karne de puli

4 patatas

2 karotas

Medyo demet de prishil

1 sevoya

Una kavesa grande de apyo

Ojas de apyo

1 findjan de azete

1 findjan de arroz

1 kucharika de salsa

Sal i pimyenta

Komo azer la Supa: La karne se lava buena. Una ora se desha kon sal por la ley de kasherut. Se pasa de muevo de la agua i se mete al tripito. En la otra parte, mete a la kaldera la sevoya entera kon la azete. Mete enriva i la karne. Friye fina ke va kedar sin agua. Despues mete 2 lt de agua kayente. Ke se buyga una ora en la kaldera. En la otra vanda apareja la zarzavat kortada. Kuando se buyo la karne, echa todo enriva i la salsa en un lugar derritida i el arroz, la sal i pimyenta. Adjusta si es menester agua buyida. La flama ke este chiko.  I ke se kozga kon repozo.

Esto te se va azer una kaldera de supa buena, savroza i saludoza. Esto es mas provechozo de mil i una kura. (Sefarad Yemekleri, paj. 18)

Despues de la supa kualo keres komer? Miraremos al livro del “İzmir Sefarad Mutfağı”. Despues de karne no se kome komida kon kezo. Se kere una zarzavatika. Azeremos Avikas kon Espinaka.

Ingredientes:

1 Kupa de avas sekas

1 kg de espinaka

1 kuchara de salsa

1 kupa agua de karne

Komo azer la komida: Si puedesh kitar una kupika de la agua del puli, antes de echar la zarzavat de la supa, da ermoza savor a la komida. Una noche antes, kale meter las avas al mojo. Demanyana kale buyirlas sin dezazerlas. La espinaka kale ke se lave buena. Si keresh metelda en un poko de agua kon agro. Se aze mas limpya. Kuando se apareja esto todo, emprimero kale friyir la salsa kon la azete para ke se vayga la golor. Despues mete enriva las avas, la espinaka, la sal i la pimyenta i la agua kayente i desha a kozer kon una flama chika. Despues de 20 – 25 puntos ya se kozeriya. Salud i Beraha. (İzmir Sefarad Mutfağı, paj. 48.)

I agora se kere un dulse. I esto ke sea de mi. Azeremos un poko de bimbriyo.  Ya estan los bimbriyos amariyos i savrozos. 2 bimbriyos ya mos abasta. Una mansana kolorada. 4 kucharas de asukar. Un poko de klavo de komer.

Parti los bimbriyos en dos. Kita los kueshkos i el korason den medyo. Munda las kashkas de la mansana. Raya la mansana. Kon la mansana rayada kale inchir el korason de los bimbriyos. I esto todo, kuatro pedasos de bimbriyo. Las kahskas, Los kueshkos, klavos de komer, asukar i una kupa de agua todo metelos a la kalderika. Emprimero se koze kon kapak i la flama fuerte, despues sin kapak fina ke se apurese i se aze kolorada. A la fin puedesh kitar las kashkas de la mansana i los kueshkos i los klavos ke son para dar una kolor kolorada a el bimbriyo.

Ya me parese ke mos se izo un menu sefaradi ermozo, de chupar los dedos. Para kitar estas kalderas no es difisil. Vos rogo ke no vos espantesh. Ya vos esto dando la resefta.

Un poko de pasensya

Un poko de ardor

Un poko de amistad

Un poko de kerensya

Salud i Beraha.

 

Siz de yorumunuzu yapın

Tüm Yorumları Görün