24 Ekim 2020 Cumartesi 23:01

Una Hanukiya ke desfia la Swastika Nazi, en 1931

Metin DELEVİ Judeo-Espanyol 1725 görüntüleme
12 Aralık 2018 Çarşamba

Era la ochena noche de Hanuka en Kiel, Alemanya, un kazal chiko kon poka populasyon i una komunidad de djudios kon 500 almas. Este anyo, el anyo 1931, la ultima noche de Hanuka kayo un diya de viernes la noche, i el Haham Akiva Boruch Posner, lider espiritual de la sivdad, koryo kon adjile para ensender la Hanukiya antes de empesar el Shabat.

En esta noche yelada de Disiembre, direktamente enfrente de la kaza de Posner se topava el sentro nazi de Kiel, kon la bandyera funesta del Partido Nazi. Kon las ocho kandelas de la Hanukiya briyando intensamente en su ventana, la mujer del rabino Posner, Rachel, tomo una foto de la hanukiya kon el edifisyo i la bandyera nazi al fondo. Eya eskrivyo unas kuantas linyas en aleman detras de la foto. “Hanuka, 5692. ‘Judea se muere’, ansi dize la bandyera. ‘Judea bivira siempre’, ansi responde las kandelas de Hanuka”.

La foto, un rekuerdo emportante del pasado, se izo una memorya ikonika de la istorya para la komunidad djudia. Ma, asta un tyempo serkano, no se saviya muncho sovre los orijines de la foto. La Hanukiya i la foto sovrebivieron la Segunda Gerra Mundial, i a la fin la Hanukiya eskapo su kamino en Yad Vashem, emprestado de la parte de Yehudah Mansbuch. Mansbuch es el inyeto de la mujer ke tomo la foto i konservo la instantanea orijinal. Kuando Yad Vashem empeso a lavorar sovre sus planes para avrir el Muzeo de Istorya del Olokosto, un ekipo de investigadores bushkaron mas sovre esta famoza foto. Sus investigasyones los yevaron a Mansbuch, ke ekspliko komo su papu i nona bivyeron debasho la opresyon nazi en Kiel, Alemanya, i finalmente komo pudyeron fuyir a la Palestina en 1934.

Yehudah Mansbuch, el inyeto de la famiya ke tomo la foto, se akodra: “Fue una tadre de viernes, djusto antes de Shabat, ke se tomo esta foto. Mi nona penso ke esta era una foto istorika, i eskrivyo en la parte posterior de la mizma foto ke “la bandyera de enfrente dezeya la muerte de Judea (djudios), ma Judea syempre sovrebivira i muestra luz bivera mas muncho de la bandyera, asta la fin del mundo”. Mi nono, el rabino de la komunidad de Kiel, akel tyempo estava dando munchos diskorsos, a djudios i a alemanes. A los alemanes avertisyo ke el kamino en el ke se estavan embarkando no era bueno ni para los djudios ni para los alemanes, i a los djudios avertisyo ke un futuro malo se estava aparejando para eyos i les konsejo ke deviyan abandonar la Alemanya. Mi papu fuyo de la Alemanya a la fin 1933 i se enstalo a Israel (akel tyempo Palestina). “Su komunidad vino a la istasyon de treno para saludarlo, i antes de partir insistyo a konsejar a sus konosidos de fuyir de la Alemanya agora ke ay tyempo “.

Los konsejos de mi papu salvo kaji a toda la komunidad; solo ocho de los kinyentos djudios peryeron la vida en el Olokosto, i el resto reusho a fuyir antes ke empese la matansina sistematika. Oy, Yehudah Mansbuch bive en Haifa kon su famiya. Kada Hanuka, Yad Vashem, le da atras la famoza Hanukiya a la famiya para asender las kandelas durante ocho diyas i despues la toma atras.

 

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın

İLGİLİ HABERLER

İLGİNİZİ ÇEKEBİLİR