El astronomo djudio detras del primer viyaje de Vasco da Gama

Metin DELEVİ Judeo-Espanyol
19 Aralık 2018 Çarşamba

Unos dos mezes antes aviya sintido el program de muestro amigo Moshe Shaul sovre la “Kontribusyon de los djudios de Espanya a la navigasyon i al deskuvrimiento del Kontinente Amerikano” en Radio Jai - Radio Sefarad. En este artikulo se trato de Yehuda ben Moshe ha-Kohen, Isaac ben Sid i de Abraham Samuel Ben Zakuto. Los nombres de los dos primeros ya aviya sintido ma el treser Abraham Samuel Ben Zakuto, no saviya nada sovre el. 

En unas kuantas linyas kije partajar lo ke me ambezi sovre este astronomo sefaradi.

Nasido en Salamanca, Espanya en 1452, Zakuto era un astronomo sefaradi, matematiko, rabino, istoriador ke domino todos los kampos de la saviduriya en los kuales se entereso. Despues de la ekspulsyon espanyola de los djudios en 1492, Zakuto se aresento en Lisbona, ande le propozaron el posto de astronomo Real debasho del Rey Juan II de Portugal.

Zakuto en kurto tiempo se izo amigo i el konsejero del rey. Mientras diskutyendo con Juan II sovre una posivle ruta para la India, Zakuto empeso a bushkar remedyos para fasilitar este viayaje.  Durante estos lavoros Zakuto invento un muevo tipo de astrolabio (astrolabe), uno ke podiya uzarse en la mar (los dispositivos anteriores lavoravan kon las informasyones de la tierra).

Ma lo ke nesesitava este astrolabio era diferentes enformasyones sovre el sol, la luna ets. Lo ke Zakuto izo despues del envento, eskrivyo un tratado astronomiko eskrito en ebreo yamado El Gran Libro: 64 tablos en detalyo ke reprezentan las pozisyones del sol, la luna i las planetas ke permetiyan a los marineros de navegar en sorveyando el sol i no la Estreya del Norte. Kon el astrolabio i una versiyon traduizida del Libro, Vasco da Gama realizo su primer viaje a la India.

Despues de este invento i el livro, Zakuto podiya retirarsa i bivir riko i kon kavod. Ma al lugar de retirarse, desidyo de bivir Tunis i en el anyo 1504,  eskrivir la istorya de los djudios desde la kreasyon asta el anyo 1500. Lo yamo este livro “La Istorya”. Este livro tuvo una reushita tan grande ke mizmo oy en diya lo puedesh merkarlo.

Siz de yorumunuzu yapın

Tüm Yorumları Görün