Frank Sinatra era un defendedor i aktivisto de los objektivos judios en los Estados Unidos i en Israel. El partisipo a las protestas i aksyones de Hollywood ke ayudaron a los judios durante el Olokosto, i la formasion del Estado de Israel. Sinatra dyo grandes montantes a la Universidad Ebrea de Yerushalayim, al Sentro Simon Wiesenthal, i ayudo a establisir dos sentros interkulturales en Israel, a los kualos dyeron su nombre. Por modo de su ayuda a Israel, sus filmos fueron enterdidos en los estados arabos.
Sinatra tuvo munchos amigos judios. Su vizina judia, la senyora Golden, le ambezo en yiddish. Sinatra teniya un kolye kon una mezuza en la punta, ke su vizina le aviya echo regalo.
Sinatra sintiya odio (nefret etmek) al predjudizmo rasial. Kuando era elevo, munchas vezes, aharvo elevos ke lo yamaron ‘suzyo judio’. Una vez, en una fiesta, kuando oyo ke a un gazetero lo yamaron ‘bastadro judio’, se echo enriva del ombre i lo aharvo. Kuando oyo ke algunos klubes de golf no estan akseptando miembros judios, se anrejistro a un klub ande la majorita de los miembros eran judios.
En el anyo 1943, entro a un konkurso nasyonal (milli yarışma), ‘’We Will Never Die’’, de kuatro mezes, en sesh paizes, organizado por Ben Hecht, para travar la atansyon publika al Olokosto. En el anyo1945, Sinatra djugo en el filmo “The House I Live In”, un filmo kurto de diez minutos sovre el antisemitizmo, i la tolerensya relijioza. Este filmo gano un Premio de la Akademia de Onor, i entro al Rejistro Nasyonal de Filmos en la Biblioteka del Kongreso, en el anyo 2007.
Komo munchos de sus kontamporenos, Sinatra ayudo al establesamiento del Estado de Israel. El partisipo a una operasyon sekreta, organizada i dirijida por Haganah, en la sivdad de New York en el mez de marzo del anyo 1948. El reprezantante de Haganah, Teddy Kollek, demando su ayuda para esta operasyon sekreta. Frank Sinatra, les ayudo embiyandoles una bolsa de papel yena de efektivo de $1 milyon.
Sinatra le disho a su ija Nancy: “Era el empesijo de una nasyon manseva. Kije ayudarles, me espanti ke no ivan a pueder reushir’’.
En el anyo1962, Sinatra vijito Israel por la primera vez, en azyendo su multinasyonal tur del mundo, por ayudar a las kreaturas menesterozas. Arekojo mas de $1 milyon para organizasiones de kreaturas en el mundo entero; dyo konsertos en Japon, Hong Kong, Ingletiera, Fransia, Italia, Gresia i Israel. En Israel, Sinatra dyo siete konsertos en sesh sivdades. Su vijita kayo en mezmo tiempo kon las selebrasiones de Yom Ha’atzmaut (Dia de la Endependensia del pais). Tambien dyo un konserto para ayudar a las tropas aeral de Tel Nof, i dyo un diskorso en Yerushalayim “yamando las personas del mundo entero para ayudar a Israel”.
En en anyo1975, Sinatra dyo un konserto en el Sentro de Konvensiones de Yerushalayim; este konserto fue lansado en el album ‘’Sinatra: The Jerusalem Concert’’.
Sinatra, munchas vezes, disho a las kameras ke Israel es su estado preferado. En el anyo1995, Sinatra selebro su ochenten aniversaryo kon munchas selebrasyones. Tambien izo un viaje a Israel en su aviyon privado kon sus amigos serkanos. Un grupo de 100 partisipantes pasaron muy ermozo tiempo kon el, en Eilat.
