Diya de la Fondasion “Golden Age” (Anyos de Oro)

Anet PASE Judeo-Espanyol
6 Şubat 2019 Çarşamba

Diya de Alhad se selebro la fondasion del Golden Age. Ya paso 18 anyos ke Golden Age esta perkurando de reunir a los aedados para ke pasen unas kuantas oras alegres, orozos kon sus amigos i amigas, en los kafes o klubes, para ke salgan afeura de sus kantonikos, ke seyan aktivos i lo mas importante es, estas todas aktividades se estan realizando kon donadores.

Alhad, en el salon de la eskola UOML, se arekojyeron los miembros del Golden Age, los aedados i los voluntaryos, bien vistidos, para este diya maraviyozo. Los miembros de Oryom, todos vinyeron angaje kon sus voluntaryos. El diya empeso kon el diskorso de la prezidenta, Sara Hazak.

Despues lo invitaron al Rav Adoni. Rav Adoni mos izo un deskorso sovre la vida. El, kon su diksyon ermozo en Turko avlo i konto sus rekuerdos i mas i mas de konsejos del Talmud sovre la amistad de la persona. Sovre ke no kale ke kede una persona sola sin amigos. Rav Adino dize ke esto se yama “Havruta”. Havruta es: estar djuntos i partajar las mismas aktividades. Para los aedados es muy importante de tener havruta para ser bivo i aktivo.

Despues Liz Abuaf i Meral Elhadef izieron una konferensia sovre el umor djudio. La konferensia atiro la atansiyon del salon porke estava adornado kon munchas anektodas.

Despues a la shena salyo el kantador Cenk Rofe. Cenk Rofe mos dio un konserto muy ermozo kon las kantikas en Espanyol, Ladino, Inglez, Fransez. Kaliya de ver komo los voluntaryos i los aedados estavan baylando i englaneandosen endjuntos. Me alegri muncho de ver este ermozo tablo. Los felisito a todos, a los donadores, a los voluntaryos, a todos ke penaron i lazdraron para realizar este diya ermozo. El Dyo Santo ke no deshe a dingunos solos, sin amigos. Amen!

 

Siz de yorumunuzu yapın

Tüm Yorumları Görün