25 Ekim 2020 Pazar 00:05

Por ke los nombres de los djudios estan gravados en los trotuares de toda la Evropa?

Metin DELEVİ Judeo-Espanyol 1801 görüntüleme
13 Şubat 2019 Çarşamba

En las sivdades evropeas komo Berlín, Viena i Roma, kon su empresionante arshitektura, guertas i monumentos, en kaminando i mirando estas maraviyas, no miramos debasho ande estamos pizando. Ma devemos de mirar de vez en kuando. Si miramos, podemos apersivir unas plakas chikitikas, plakas de leton  enstaladas entre las pyedras del trotuar, kon solo unas kuantas informasyones:  un nombre, una data i un destino.

La mankura de detalyos en estas informasyones mete un emfasis sovre un otro fakto de una otra mankura, de las personas ke las pyedras komemoran.

El Stolpersteine (“piedras de tropiezo” – tökezlemek - en alman) fue imajinado por Gunter Demnig en 1996, i enstalo 60 pyedras en Berlín, a las eskondidas, antes de demandar i tomar las permisyones adekuadas. El proyekto fue una reushita kompleta i komo se dize en estos diyas se izo “viral” (ke se transmityo de un lugar a otro en kurto tyempo), kon mas de 60,000 pyedras enstaladas en otros 20 payises, inkluyendo Rusia, Espanya i la Suis. Demnig pensa ke es muy siynifikante por el de enstalarlos dainda kon sus propyos manos.

Las plakas, ke komemoran a los djudios, romanes, sintis, omoseksuales i otros ke sufriyeron i fueron persekutidos por los nazis, se enstalan delantre de la ultima rezidensiya (o, a las vezes delantre de los lugares ande lavoravan) de las viktimas. El proyekto se esta finansando kon kontribusyones endividuales i, malgrado ke se empeso a konoser i yamado komo “el monumento desantralizado el mas grande del mundo”, la operasyon se esta vyendo por Demnig komo una tentativa chika ke deve de agrandeser. Un filmo dokumentaryo sovre Demnig fue echo por la sineastre alman, Dörte Frank. 

Kon este memorial modesto ma muy poderozo para las viktimas de los nazis, mos akodran: ke estas personas biviyan en esta sivdad, en esta maale, en esta kaleja, en esta kaza o lugar de lavoro, i podiyan ser muestros vizinos.

Aunke la salvajeria del Nazismo no pudo depasar las frontyeras de la Evropa kontinental, la memorya de las viktimas no tyene frontyeras. El primer stolpersteine afuera de la Evropa fue enstalada en Buenos Aires en el 30 Oktobre 2017. Esta seriya de stolpersteine fueron enstalados en frente de la eskola Pestallozzi en Buenos Aires para komemorar los chikos ke fueron ovligados a fuyir de la Evropa entre 1933 i 1945. Fue la idea de un ex-alumno de la eskola ke teniya un STOLPERSTEINE enstalado para su famiya en Konstanz unos kuntos anyos antes.

Yo personalmente esto suivando los lavoros de Gunther Demnig. Antes 2 mezes resivi un avizo de esta organizasyon dizyendo: “malorozamente, el kalendaryo de Gunter Demnig para los mezes futuros ya esta kompleta, no podemos organizar mas seremoniyas de enstalasyon de Stolperstein antes del 10/2019. Muestra lista de espera es den diya en diya mas larga i apresyamos su pasensya i entendimyento”.

Esta lista ke se esta alargando en kada diya sinyifika ke mos estamos dayinda akodrando i no olvidando. Komo dishimos: Estamos akodrando, i nunka mas.

 

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın

İLGİLİ HABERLER

İLGİNİZİ ÇEKEBİLİR