26 Ekim 2020 Pazartesi 15:53

Un Komedyano popular djudio se adelanta en las eleksiyones prezidensyales de Ukranya

Metin DELEVİ Judeo-Espanyol 1552 görüntüleme
10 Nisan 2019 Çarşamba

Un komedyano djudio sin eksperiensya sovre la politika se adelanto en el primer torno de las eleksyones prezidensyales de Ukranya.

Los primeros rezultados i las anketas antisipados amostran ke Volodymyr Zelenskiy, de 41 anyos de edad, ke djuga i enterpreta un prezidente imajinaryo  en una seriya popular de televizyon lokal, se topa delantre del prezidente aktual Petro Poroshenko, aunke dayinda no toparon la mayoriya de 50%.

Aunke fue kritikado por no tener una eksperiyensya sovre los detalyos de la politika, el surjimyento de Zelenskiy es un poderoso “challenge” para los politikos veteranos Poroshenko i la ex-primera ministra, Yulia Tymoshenko, ke kedo en el treser lugar.

No se espera ke dingun kandidato va poder resivir mas de la mitad de los votos, lo ke sinyifika ke la eleksyon ira al segundo torno el 21 de avril.

“Me gustariya remersyar a todos los ukranyanos ke no votaron solo para amuzarsen”, disho Zelenskiy a sus simpatizantes la noche de alhad. “Es solo un empesijo, devemos kontinuar i no relaksar”.

Kontinuando kon el stilo relaks de su kampanya elektoral, la noche de la eleksyon, Zelenskiy i sus sempatizanos fyestaron el rezultado. I una sorpreza, en la fyesta aviya un bar, futbol de meza i djugos de ping-pong i todo esto debaldes!

Poroshenko kalifiko el resultado komo una “lisyon grave”, espesialmente de los votantes mas mansevos i demando a estos mansevos un apoyo en el segundo torno.

“Vozos estash viendo trokamyentos en el pais, ma keresh ke seyan mas prestos, mas profundos, i de mijor kalidad. “Yo ya esto entendyendo los motivos detras de vuestros protestos”, disho Poroshenko.

Zelenskiy obtuvo el 30.6 por syen de los votos, en komaparando kon el 17.8 por syen de Poroshenko, segun una anketa antes de los resultados finales publikados a las 11 de la noche, tres oras despues de la serradura de la votasyon.

Su kampanya elektoral era bazada sovre las medias sociales i por primera ves sovre los skeches, shakas, kantikas i bayles burlandose de sus rivales politikos.

“Esto es un kombate para trokar el pais, para trokar el sistem politiko. “El pais se diskredito enteramente, i no esta apoyado ni por los sivdadinos de la Ukranya ni de por los paises oksidentales”, disho a Reuters el ayudante i konsejero prensipal politiko de Zelenskiy, Dmitry Razumkov. “Despues de sinko anyos de kombate kontra la korrupsyon, oy tornimos a ande empesimos”.

La kampanya elektoral de Zelenskiy paresiya ser entre la realidad i la seriya de televizyon ande el interpreta un profesor de istorya muy muy onesto ke aksidentalmente fue konvertido en prezidente.

En la tresera sezon de esta seriya, ke empeso este marso, el prezidente es metido a la prizion i el pais kaye debasho del kontrol de los oligarkos, populistos i ultranasyonalistos i el pais se diviza en 28 estados. Los personajes ke subtilmente asemejan i afilu paresen a Poroshenko i Tymoshenko toman el poder.

“El, Zelenskiy enkarna la nesesidad ke se ve de “karas muevas” en la politika i va poder tomar ansi los elektores mansevos, ke esten dezeyando reformas, a su lado”, disho Agnese Ortolani, analista de The Economist Intelligence Unit.

 

 

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın

İLGİLİ HABERLER

İLGİNİZİ ÇEKEBİLİR