25 Ekim 2020 Pazar 00:03

Kualo sinyifikan las alkunyas i sus importansa?

Metin DELEVİ Judeo-Espanyol 1613 görüntüleme
8 Mayıs 2019 Çarşamba

Kuando se uzan nombres en el ritual djudio, rituales komo resivir un Aliyah para la Tora, kazamyento, divorsio, en los dokumentos de konversion, en las tombas o orasyones de komemorasyon, los djudios se identifikan kon sus nombres ebreos, i el nombre de su madre o padre, o a vezes todos los dos. Un konverso ke segun la ley djudia, se konsidera komo un muevo nasido, toma un nombre djudio i se konsidera el ijo del patriarko Avraam o matriarka Sara. Se puede dizir ke el uzo de tomar alkunyas es relativamente muevo. En el 11 de marzo de 1812, los djudios en Prusia resivyeron el sudito kon la kondisyon de tomar i uzar alkunyas.

Los djudios espanyoles empesaron a uzar las alkunyas en el siglo X u XI. Este uzo solo se izo popular en la Evropa del Este en los siglos XVIII i XIX, kuando los governos ensistyeron sovre esto komo kondisyon para la emansipasyon. La razon de esta insistensya sovre las alkunyas en la Evropa del Este era ke el governo poderiya empozar taksas i edukar sus sivdadinos. Imajinad la difikultad de mandar una faktura de taksa a Moshe, el ijo de Avraam. La deskonfienza jeneral ke los djudios teniyan en las otoridades, los ovligo a evitar de tomar alkunyas lo mas tadre posivle. La emansipasyon ke se propajo sovre toda la Evropa en los siglos XVIII i XIX, trusho una mijor asimilasyon de los djudios a la sosyetad en jeneral, tambiyen izo ke los djudios adoptaron alkunyas para entegrarsen a los uzos de los paizes.

Las alkunyas djudios fueron seleksyonadas en bazando sovre varios kriteryos. Si avlamos de las alkunyas ashkenazi se deve tener un konosimyento del yiddish, afilu chiko,  para entender la mas grande parte de las alkunyas. Algunos tomaron alkunyas ke azen referensya a los padres (por egzempyo, Mendelson, Gittelson), inkluyendo los djudios ke pudyeron ver su soy asta Aaron, el primer Kohen Agadol. Jeneralmente, las alkunyas komo Kohen, Kagan i Katz, fueron eskojidos para aksentuar su status spesyal de “Kohen”. Otros eskojeron sus alkunyas por respekto a sus sivdades de orijin (Berliner, Frankfurter, Moscowitz). De otra parte, otros izyeron referensiya a sus okupasyones. Farber sinyifika boyadji, Feinstein sinyifika djoyero, Kramer sinyifika tendero de magazen, Bronfman sinyifika destilador, Feder sinyifika eskrivano i Richter sinyifika djuzgador.

Algunos solo utilizaron sus alkunyas kuando teniyan echos kon las otoridades, i no lo tomavan muy en seryo. Syertos se tomaron alkunyas arbitraryos komo Feiffer (chuflete), Fried (orozo), Hoch (alto), Klein (chiko), Gross (grande), Weiss (blanko) i Schwartz (preto). Algunos tomaron los nombres de hayot komo Baer (lonso), Adler (agila), Falk (halkon), Fuchs (renar), Loeb (leon) i Ochs (bofano)! Otros optaron por las alkunyas ke se referan al mundo de los arvoles komo Birnbaum (arvole de pera), Kirshenbaum (arvole de serezas) i Teitelbaum (palmiye).

El soy, la rasa es importante para los djudios. Saver el nombre en ivrit i el de la madre i padre es, por syerto, mas importante para la kontinuidad djudia, ke de saver la alkunya de uno.

 

 

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın

İLGİLİ HABERLER

İLGİNİZİ ÇEKEBİLİR