Djoha bivia en una kaza grande kon dos vizinos. Kada uno tenia una oda.
Los tres eran muy muy proves: kada dia se ivan a durmir sin komer. Ama los vizinos eran muy mintirozos...
El uno dizia: “Ah esta noche yo komi gayina.”
El otro dizia: “Yo komi pishkado.”
Le demandavan a Djoha: “I tu ke komites?” “Nada”, dizia Djoha.
Una noche los vizinos se hueron a durmir i empesaron a sonyarsen ama komo estavan muy ambiertos, se despertaron i no pudieron mas durmir. Disho el uno:
“Kualo te sonyates?”
“Yo me sonyi ke me estava indo a la Amerika, i tu?”
“Yo me sonyi ke me estava indo al Japon”.
“Bueno i tu, Djoha, kualo te sonyates?” “De tanta ambre ke tenia, no me sonyi nada.”
Disheron: “Kualo vamos a azer, keremos komer.”
“Savesh kualo? Manyana vamos a ir al soko a lavorar. Los groshes ke vamos a ganar los vamos a meter endjuntos. Vamos a merkar pan, guevos i todo... Vamos ir a durmir i a la demanyana los vamos a despartir entre mozotros.”
Disheron bueno. I ansina izieron. Los dos mintirozos se hueron a durmir...
I Djoha se fue a durmir. A la demanyana disho el uno al otro:
“Yo me sonyi ke me hui a l’Amerika... Me ize riko. Me kazi, merki una vila, esto i otro.”
Bueno.
Vino el otro; “Yo me hui al Japon. Tuve una geysha keme lavo i me izo chay.
I tu Djoha?”
“Yo no me sonyi nada”.
I bueno disheron los vizinos, “Si no te sonyates nada vamos a komer”.
Disho Djoha: “La verdad? Komo no me sonyi nada, yo vide ke uno se hue a Amerika, el otro al Japon. Pensi, estos ya no van a tornar mas... Me komi todo!”
Kontado por Şeli Gaon