Un konserto inolvidavle de Enrico Macias

Şeli GAON Judeo-Espanyol
15 Mayıs 2019 Çarşamba

El kantador fransez de orijin de Aljeriya, dyo un konserto inolvidavle en el sentro “Zorlu Performans”. Durante dos oras en pyes, kon una boz de seda, el kanto en fransez, en espanyol, en arabo, en ebreo i en turko kon una performansya ekstraordinarya.

El komemoro “Dario Moreno” kon sus fotos i kon la kantika “Izmir mi Korason” (Canım Izmir), porke “Dario Moreno” (z”l) lo izo konoser en Estambol i el puevlo lo kijo muncho byen.

Enrico Macias, salyo a la shena en el salon de konserto famozo “Carnegie Hall” en New York, komo el artisto prensipal en 1968. El nasyo en la Aljeriya i en el anyo 1961 vino komo refujyado a la Fransya.

Durante su karyera ke duro mas de 50 anyos, izo sienes de kompozisyones i 80 de estas kompozisyones fueron tradusidas al turko. En los anyos 1970, Ajda Pekkan, Kamuran Akkor, Tanju Okan, Seyyal Taner kantaron las kompozisyones de Enrico Macias. Antes unos kuantos anyos, el selebro sus 80 anyos kon una turne spesyal. Kon su boz ekstraordinaria, aktiva los sentimyentos de sus oyentes.

El tyene una dicha: “Kero ke mis kantikas traygan la Pas, la Liberta i la Egalita. I esto no es el dover de un kantador?”. Enrico Macias, 2016.

El es un artisto konosido i famozo en el mundo entero. Antes del konserto en Estambol, izo una avla muy sentimental, ke esta muy kontente de estar en Estambol, i disho: “Espero ke el sol va briyar syempre enriva de este pais maraviyozo ke es la Turkiya”.

Enrico Macias despues ke kanto la kantika “Paris m’as pris dans ses bras” (Paris me tomo entre sus brasos) mos dyo la sinyifikasyon de esta kantika.

“Paris me aksepto i me esto sintyendo bueno en los brasos de Paris, ma yo me esto sintyendo mas bueno en el korason de Estambol, en esta sivdad maraviyoza i no en Paris”…

La gitara en su mano kanto vente kantikas, “Solenzera”, “Zingarella”, “Chante chante Gitare”, “La Femme de mon ami”, “Yaase Shalom” i otras…

Enrico Macias izo su primer disko en 1962 i salyo a la televizyon franseza i se izo famozo en una noche. El anyo 1964 es el anyo de sus konsertos en Paris, en la Gresya, en la Turkiya, en Moskova, Japonya, Espanya, Italya i en 1968 en Chikago, Los Angeles i en 1976 en Israel. Kanto en munchas linguas diferentes komo en fransez, en italyano, en espanyol, en ebreo, en turko, en grego, en arabo, en ermenesko, en yidish... En 1992, djugo en un filmo de la televizyon “Ke Noche” (Quelle Nuit). Tyene una odiensya muy ancha en el mundo entero.

A la fin del konserto, salyo a la shena kon 40 koristos i 20 vyolonistos de edad 13, kon eyos kanto “Enfants de Tous Pays” (ijikos de todos los paises), i

“Hoş Görsen”.

      Termino la nochada en dizyendo: “Keridos partisipantes mersi de vuestra asistensya esta noche. Komo syempre no me deshatesh solo, i inchitesh el salon fina ariva, vos kero msuncho byen i me namoro de Estambol i del puevlo ospitalyero de la Turkiya… Mersi!”

 

Siz de yorumunuzu yapın

Tüm Yorumları Görün