Komo La Kukla ‘Barbıe’ Se Izo Famoza

Dora NİYEGO Judeo-Espanyol
29 Mayıs 2019 Çarşamba

Ruth Handler (nasida Rubenstein) en Denver, Colorado, era de una famiya de emigrantes judyos polakos.

En uno de sus viyajes a Suiza, Handler vido una kukla nombrada Lilli, i penso ke Lilli iva ser un djuguete perfekto para su ija, Barbara. Handler aviya obzervado ke a Barbara i sus amigas les plaziya djugar kon kuklas adultas. Estas kuklas teniyan el puerpo feminino de las adultas. Para Handler, esto era una forma de praktikar para la edad adulta.

Ruth i su marido aviyan fondado una kompaniya de djuguetes, Mattel. Handler konvensyo a su marido i el ekipo de desinatores de Mattel, a kitar una kukla mas femenina.

En el anyo 1957, Mattel kito una kukla ke paresiya a la figura de Lilli, ma kon un poko de makyaj, una sonriza en la kara, i un puerpo mas feminino. A esta kukla Ruth Handler le dyo el nombre de su ija, Barbie.

La entroduksyon de Barbie komo una kukla de djugo izo grande sukseso en el market, ma uvo i munchas personas ke pensaron el kontraryo. Disheron ke una kukla ke tiene un puerpo feminino puede influensar negativamente las kreaturas chikas. Las feministas lucharon kontra Barbie, dizyendo ke Barbie es un objekto seksual, se viste komo mankena, i le plaze azer solo los echos de kaza.

Para efasar estos komentaryos negativos, Mattel empeso a echar otros pasos. Sin trokar la aparensya fízika de Barbie, Mattel empeso a prezentar munchos personajes segundaryos komo amigas de Barbie. Estos personajes teniyan diferentes profesyones; un atlet olimpiko, un pilot de la fuerza aerea, un proprietario de una butika, un desinator de moda ets. Estas kuklas todas nombradas Barbie, teniyan mas de syen profesiones en total.

En akeyos anyos, las kreaturas estavan salyendo lokas por Barbie, no solo porke Barbie era buena i ermoza, sino tambien porke teniya profesyones ke estos diyas se konsideravan difísil para las mujeres, komo por egzemplo ser una astronota.

La aktivista politika Susan Stern, en el dokumentario ‘Barbie Nation’, aviya dicho ke Barbie tiene una personalidad de una ija amerikana. En akeyos diyas, las mujeres deviyan pareser seksual. Barbie nunka se kazo. Eya era una mujer de karyera ke le plaziya ser endependiente.

Komo no teniya marido, Barbie reflektava la tradisyon materyalista de la sosyedad amerikana, tenyendo siempre menester de vistimyentas muevas i produktos de ermozura. El kliyente no solo iva merkar la kukla Barbie, ma tambien kaliya ke merke los produktos ke Barbie tiene menester.

Kuando estas kreaturas se engrandesyeron, les kontaron a sus ijas komo Barbie influenso las kreaturas de akeyos diyas. Kon tiempo, Barbie evolusyono segun los interesos de kada jenerasyon. Grandes nombres en la industriya de la moda empesaron a desinar para Barbie. Barbie empeso a viyajar a munchos payizes en lugares leshos komo Asia, Evropa, Afrika. Esto izo ke las kreaturas de estos paizes la konoskan, i ansi Barbie se izo famoza en el mundo entero.

 

Siz de yorumunuzu yapın

Tüm Yorumları Görün