Una mueva teknolojiya Israelí agora puede konjelar las selulas kanserozas

Metin DELEVİ Judeo-Espanyol
3 Temmuz 2019 Çarşamba

Una kompanyia israeli bazada en la sivdad de bodre de mar en el norte, en Ceasarea, desvelopo una teknika muy sempl i revolusyonarya para konjelar tumores kanserozos ke no nesesita una grande operasyon ma solo una entervansyon chika kon una anesteziya lokal.

La mayoriya de los hazinos pueden ser tratados aryento de una ora i en algunos kavzos menos de diez a kinze puntos.

Ya se esta tratando miles de mujeres kon kanser de pecho (teta) en todo el mundo en los ospitales, klinikas i afilu en las ofisinas de doktores spesyalizados, en munchos paises, inkluzo la Japonya, la Australya, la Almanya i la Espanya kon esta teknolojiya. Aktualmente en los Estados Unidos se esta azyendo los testes nesesaryos para ser akseptado de la parte de la FDA.

El vis-presidente de Icecure Medical, Elizabeth Sadka ekspliko ke este metodo va pueder “ramplasar la operasyon medikal ke se aze oy en diya, para una syerta povlasyon spesifika de hazinos a los kualos podemos ofreser un remedyo medikal kon una entervansyon minimal”.

El metodo es muy simple. Se injekta una solusyon de kuras metido a una temperatura de -274 grados Fahrenheit en el tumor kanserozo para konjelarlo, deshandolo inaktivo i dando la posibilidad al puerpo de eliminar estas selulas kanserozas komo lo aze naturalmente kon otras selulas muertas aryento de unos pokas semanas.

Solo keda una sikatris minimal en el pecho. Ma no keda dinguna otra trasa en el resto del puerpo o organes.

La mayoría de los hazinos pueden ser tratados maksimum aryento de una ora i en algunos kavzos este tyempo abasha a dyez o kinze puntos. I ansi los hazinos pueden tornar a sus kazas el mizmo diya o el diya sigiente.

“Grasyas a muestra teknolojiya mueva, podemos konjelar tumores no solo de pecho ma de diferentes tipos i grandura. Mas presto se diagnostika el tumor, mas chiko va ser el tumor. I ansi el tratamyento va ser mas kurto, mas fasil i lo emportante, mas efikasyo.

(Transladado de https://www.i24news.tv/en/news/technology/1559579370-new-israel-technology-can-now-freeze-cancer-cells)

 

 

Siz de yorumunuzu yapın

Tüm Yorumları Görün