30 Ekim 2020 Cuma 01:05

El Reflo Del Dezierto

Eliz GATENYO Judeo-Espanyol 1637 görüntüleme
31 Temmuz 2019 Çarşamba

“El Reflo del Dezierto” fue kreado por un ekipo yamado DAST komo una manyifika enstalasyon de arte en los deziertos de Ejipto. En 1995, la artista de enstalasyon, Dana Stratou, la desenyadora endustrial i arkitekta Aleksandra Stratou i la arkitekta Stella Konstantinidis se reunieron para realizar este enteresante proyekto.

Verdad ke, el buto de este proyekto era bazado sovre el dezeo de lavorar todos endjuntos en el dezyerto. El ekipo entero teniya en el tino de realizar un proyekto en un lugar komo un dezierto donde la sensasyon de eternidad se sintiya muy profondamente. Estavan pensando de dar el sentimiento espiritual inkreyivle de la atmosfera, kon el peyzaje del dezierto. La baza del proyekto es de amostrar la inkreyivle formasyon natural del dezierto i la natura de la arena komo material.

“El Reflo Del Dezierto” en El Gouna se topa serka de Hurghada en el dezierto ejipsyano, al bodre de la Mar Kolorada i kuvre una superfisiya de 100 000 metros kares.

Este enteresante echo empeso en 1995 i se kompleto en 1997. Para realizarlo se empleyo 8000 metro kubikos de arena. Sovre todo la vista de las fotografiyas tomadas por las satelitas es inkreyivle.  La pisina en el sentro de las foyas en medyo del dezierto es una ovra rala ke merese ser vista.

La zona de esta ovra artistika fue realizada kon kuentos matematikos. Es muy difisil de verla kuando la djente se topa en basho, esta ovra  fue kompozada de grandes montes konikos i grandes foyas de arena eskondidas i kavakadas. Se ve klaramente del aver su pisina en el sentro, 89 konikas i 89 foyas redondas al entorno. Espesyalamente, kuando se ve desde el espasyo, sale una pintura muy ermoza. Mos aze pensar ke komo puede ser ke la agua de esta pisina de en medyo, ke tiene 30 metros de diametro, no se evaporo en 22 anyos. La mijor manera de asistir a este peyzaje majiko es de salir de El Gauna por la otobana prensipala. Ansina se puede yegar a piye a la zona majika de “El Reflo Del Dezierto”. Se puede tambien alkilar bisikletas o otos. El mijor momento para vijitar este arte ke da un sentimiento de infinidad es temprano en la demanyanika al amaneser o djusto antes de la tadrada. Malgrado ke la ovra no estava protejada, la sensibilidad matematika aplikada en el kampo, mos da un sentimiento verdadero de kuriozita. “El Reflo del Dezierto” es una struktura ke deven de ver las personas, ke se van a ver las Piramides o los artifaktos ejipsyanos. 

 

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın

İLGİLİ HABERLER

İLGİNİZİ ÇEKEBİLİR

GS3

Tünelin Ucu-İzel ROZENTAL

Tünelin Ucu-İzel ROZENTAL

Mozotros Ailesi- İrvin Mandel

Mozotros Ailesi- İrvin Mandel