Septiembre, La Sezon De Las Novedades

Şeli GAON Judeo-Espanyol
28 Ağustos 2019 Çarşamba

Septiembre es el mesajero de una sezon mueva, de una perioda mueva, de un anyo muevo i de las fyestas: Rosh-Ashana, Kipur i Sukot para los djudyos.

Para todos tyene una sinyifikasyon diferente. La perioda mueva de la edukasyon en las eskolas, las famiyas kon grande ajitasyon porke los ijos van a empesar a la eskola…

Dingunos no dezeyan los tyempos yelados ni la vinida a poko a poko del invyerno, ma despues de las kalores lokas, tomar un poko de aver fresko es posivle kon el otonyo i ay munchas personas ke keren byen esta sezon.

Kuando se dize otonyo, mos vyene al tino la kolor amariya i las ojas ke kayen de los arvoles. Los tyempos kayentes del enverano ya empesan a terminarsen. Las noches mas freskas i las personas kon una jaketa i no kon mangas kurtas. Las luvyas empesan. Despues de la luvya la golor maraviyoza de la tyerra ke absorba la agua de la luvya en todo modo de lugar. Los arvoles i las rozas golen al miskle.

Septiembre es la sezon de movimyentos. Se ve una preparasyon, una enerjiya en todo modo de lugar. Septiembre es la sezon de la resureksyon (diriliş) i de las diferentes emosyones.

El otonyo es el tyempo ke la vedrura de la natura empesa a poko a poko a devinir amariya. Es el tyempo de la tristeza, del amor i de la separasyon. La fin de unas vakansas de tres mezes. Espertar temprano para ir a la eskola, preparasyones para invyerno ke va pasar yelado. Spesyalmente la natura troka, los tyempos mas yelados.

Tornar de las islas, empesar a aparejar las kazas para las fyestas sakras...

Los dias se akurtesen, las noches se alargan, el sol se esparese mas presto, da mas poka luz i kayenta mas poko. Las yervas empesan a sekarsen. Los pasharos emigran a otros paizes. En mizmo tyempo el otonyo es la sezon de las hazinuras. Kale azer atansyon para no hazinearmos.

Entremientes azeremos aparejos en muestras kazas komo, organizar los almaryos de vistimyentas, guadrar lo de enverano i kitar lo de invyerno. Duzudear las bluzas, los pantalones i los fostanes. Trokar el lugar de los mobles para tener una enerjiya mueva. Aranjar i alimpyar el mupak antes de las fyestas. Aparejar los stokes de las komidas de invyerno komo, pasta de tomates (salsa), marmeladas diferentes, azer trushi i otras kozas savrozas…

Komo el tyempo va yelar siguramente ke no vamos a puder salir de kaza las noches, i por esto devemos de azer una lista para ver los filmos ke keremos suivar.

Alevantar los vantilatores i guadrarlos ariva de los almaryos.

Analizar lo ke gastimos en enverano i ekilibrar muestros gastes.

Lo mas emportante, mos renovaremos (kendini yenilemek), para tener una imaj diferente kon kaveyos kurtos, azer dieta para aflakar un poko i para sintirmos mas aktivos i kon enerjiya, syempre las manos byen miradas, los kaveyos penyados, vistidas komo kale i deshar un buen efekto al den frente.  

 

Siz de yorumunuzu yapın

Tüm Yorumları Görün