Konosesh este personaje, Karolos Koun, el fundador del teatro moderno en la Gresya?

Karolos Koun (13.09.1908 14.02.1987)

Metin DELEVİ Judeo-Espanyol
25 Eylül 2019 Çarşamba

Su verdadero nombre era Karolos Koen i nasyo en Bursa en 1908 de madre grega i de padre djudio lehli. Kompleto su edukasyon segundarya en el Robert College de Estambul i despues estudyo estetika en la Universidad de Sorbon. En 1929, se izo profesor de Inglez en el Kolejyo de Atina. Endjuntos kon sus estudiantes de la universidad, metyo a la shena munchas ovras de Aristofanes (inkluyendo “The Birds - Los Pasharos”, “The Frogs - las Ranas”, “Cyclops i Plutus”) i de Shakespeare (A Midsummer’s Night Dream - Un Esfuenyo de Noche de Enverano). Fundyo el Teatro del Puevlo en 1934 i kolaboro kon varias kompanyiyas. En 1942, fundyo el Art Theatre, ande metyo a la shena ovras de Ibsen, George Bernard Shaw, Pirandello, i por primera vez en Gresia, despues de la liberasyon de la okupasyon almana, las piesas de Lorca, Tennessee Williams, Arthur Miller, ets. En el mizmo anyo, fundyo tambyen la eskola de drama en su teatro, ande estudyaron munchos de los direktores i aktores los mas importantes de la jenerasyon grega de despues la gerra.

Ma kuando empesaron difikultades finansyeras, el Art Theatre tuvo ke serrar en 1949 i avrir de muevo en 1954 en forma de teatro en la ronda, un modo de teatro moderno ande no ay shena i los aktores performan en medyo de los spektatores. Entre 1950 i 1953, Koun kolaboro kon el Teatro Nasyonal de Gresya, dirijendo ovras de Anton Chekhov (Tío Vanya, Las Tres Hermanas), Pirandello (Henry IV), ets. Despues del repertuar abitual del Teatro de Arte, Koun tambyen  desidyo de introduzir las muevas tendensyas. del teatro etranjero a la odiensya grega, inkluzo los otores modernos Brecht, Ionesco, Beckett, Pinter i Dario Fo. Tambyen prezento los lavoros de otores gregos, komo Kampanellis, Kechaedes, Skourti, Anagnostakis i Efthimiadis, ansi ke las ovras klasikos de los tragedyas gregos  de la antikidad  i Aristófanes.

En 1959, metyo a la shena The Birds – los Pasharos de Aristofanes en su teatro, kavzando muncha kontroversya achakes de la forma progresiva de la prezentasyon. Mas despues organizo dramas antikos en varios festivales, en Atina i Epidavros, i mas depues partisipo en el “Teatro de las Nasyones”, reprezentando ovras de teatro en París, Londra, Zurich, Munich, Moskova, Leningrad, Varsovia i Venezia.

En 1984, el governo grego dyo un lugar en el distrikto de Plaka para inogurar el Teatro Karolos Koun. Resivyo varios premios, entre eyos el Phoenix, el Premio de Plata de la Akademia de Atina i el Premio del Teatro de las Nasyones. En su testamento, desho komo erensya el titulo de Teatro de Arte a tres de sus kolegos, demandandoles ke kontinuyen sus kolaborasyones en el Teatro de Arte Karolos Koun. Koun eskrivyo dos ensayos, titulados “La antigua tragedia - komedia” i “El direktor i el antiguo drama”. Koun syempre estuvo interesado en las ovras gregas kontemporaneas, las ovras teatrales gregas kontemporaneas i el teatro antiguo i el teatro klasiko desde una perspektiva moderna.

Karolos Koun desho la vida en 14 Febrero 1987.

Siz de yorumunuzu yapın

Tüm Yorumları Görün