En la Tora, el empesijo del anyo, esta muy klaro ke es el primer diya del mez de Nisan (del kalendaryo Djudyo). Nisan puede koresponder al mez de Marso o Avril.
El Dyo Baruhu dize a Moshe Rabenu i a Aron en la tierra de Misrayim, “este mez va ser para vozotros el empesijo de los mezes i va ser el primer de los mezes del anyo para vozotros”.
La sorpresa es ke el mez de Tishri komo empesijo del anyo muevo viene muncho mas despues en la Tora i no ay ninguna eksplikasyon del porke paso de un mez al otro mez. El Dyo Baruhu avla ke en esta fiesta ay ke oyir el Shofar, “El Sieten Mez, el primer dia del mez, van a tener un deskanso absoluto, i van a selebrar kon el sonido del Shofar, azyendo muncho bruido”. Este diya no tiene el nombre de Rosh aShana, ni tiene la fonksyon de djuzgar, i no se konose komo aniversaryo de la kreasyon del mundo.
Lo ke es interesante es ke el Sieten Mez empesando de Marso es Septiembre (Sieten Mez) ke koresponde al Elul. El ochen mez es Oktubre (Okto-8-Ocho en Grego). El Mueven Mez es Noviembre (Mueve -9). El Diezen mez es Disiembre (Diez -10). Esto da a pensar ke Marso era el primer mez en munchas nasyones.
En el segundo siglo de muestra era, Rosh aShana ya estava konosido komo el empesijo del anyo muevo. Esto se refera al anyo muevo de la agrikultura.
Otra koza ke es muy interesante es ke sea Marso, sea Septiembre son los mezes ande el sol pasa de una zona a la otra. (Ekinox-Solstis-Dönenceler). Keriya tan bien aklarar ke en la lingua turka tenemos algunos nombres de Mezes ke tienen raises semitikas. Yo rekuerdo ke en mi chikes el mez de Ekim se dizia Teshrin. Aviya doz Teshrines: Teshrin Evvel: Ekim i Teshrin Sani: Kasım. Otros nombres de mezes komo Nisan, Eylül, Tamuz, Shevat (Şubat) son de rais semitikas.
Ay ke saver ke el anyo de agrikultura no fue unikamente uzo del puevlo Djudyo, ma munchos otros payizes alderedor de la Tierra Santa utilizaron este kalendaryo para la agrikultura.
En el Museo Arkeolojiko de Estanbol, tenemos una tavla en barro ke se yama el “Kalendaryo de Gezer” ande se puede ver ke para kada aktividad de agrikultura se avla de un mez ke le koresponde.
El Prof. Tadmo dize ke Nisan era el empesijo del anyo Muevo en Judea (la parte de Sud-parte de abasho) i Israel (la parte Norte-parte de ariva) selebrava el anyo muevo en Tishri.
En los rulos de Kumran (Mar Muerta) el empesijo del anyo muevo es Nisan. Segun Yehezkiel Kaufmann, algunos akademikos dizen ke el anyo muevo empesa en otonyo i deve de ser ke se baza sovre la kostumbre de Babilonya ke selebrava el anyo muevo a la fin del enverano. Esto mos aze akodrar ke Rambam en el siglo 13, diziya, estos dos empesijos del muevo anyo de Nisan i Thishri, tienen relasyones kon los dias de la semana. Nisan es la salvasyon de la esklavitud de Misrayim, el sieten mez es Tishri, komo el sieten diya es Shabat. Los dos empesijos para otros akademikos simbolizan la universalidad del Judaismo.
Otro komentaryo puede ser semejante al siklo del diya. Para mozotros el diya empesa a la puesta del sol. Es dizir el diya no empesa kuando mos despertamos, ma empesa kuando eskurese. Ansi el anyo muevo empesa no kuando el sol kalyenta el mundo, al kontraryo, kuando se eskapan los dias de kalor para dar la bienvenida a las luvias, al friyo ke van a lavorar la tierra para tener un buen produkto en la primavera. (Pesah)
Ay ke pensar ke si los Djudyos empesavamos muestra istorya en Australya o Mueva Zelanda ande el sol da la buelta al reves, kuando aki es el enverano, aya es el invyerno. El kalendaryo no iva ser el mizmo ke oy, es dizir, Tishri iva ser el primer mez i Nisan el sieten mez.
Adaptado i adjustado al artikulo de Michele Alperin de New Jersey.
