27 Ekim 2020 Salı 14:56

Una aktrisa djudia famoza en su pais ke no konosiyamos

Metin DELEVİ Judeo-Espanyol 1563 görüntüleme
16 Ekim 2019 Çarşamba

La semana pasada, el 10 de Oktubre egzaktamente, vide un avizo sovre “oy en la istorya”. En primero no kije meldarlo ma una fraza en este avizo me entereso. El avizo era:

Una estreya del sinema kayo (o mudo) de la India i en mismo tyempo produktora de sinema, Sulochana, muryo en Mumbai (akel tyempo se yamava Bombay) a los 76 anyos en esta data (10 de Oktubre) en 1983.

Vash a dizir kualo es enteresante en este avizo?

El nombre verdadero de Sulochana era Ruby Myers i era djudia!

Myers nasyo en Pune, India en 1907. Era de una famiya djudia Bagdadi. En lavorando komo operatora de telefon fue deskuvyerta por Mohav Bhavnani, el patron de Kohinoor Film Company, una de las mas grandes kompanyias de la endustriya de sinema de la India. Aunke entusiasmada kon esta propozisyon, le refuzo porke ser aktrisa era konsiderado komo una profesyon bastante dubyoza para las mujeres de akel tyempo. Ma Bhavnani ensistyo kon su propozisyon i eya finalmente aksepto malgrado ke eya no saviya absolutamente nada sovre la sinema.  Myers se izo en poko tyempo una estreya de sinema basho la direksyon de Bhavnani en Kohinoor antes de pasar a la Imperial Film Company. En este muevo empleyo, en kurto tyempo, Myers se izo una de las aktrisas de las mas mijor pagadas de la endustriya de sinema.

Entre sus filmos populares se puede sitar, Typist Girl (1926), Balidaan (1927) i Wildcat of Bombay (1927). En el filmo Wildcat of Bombay, Myers interpreto ocho rolos diferentes, entre eyos un polis, un “gentleman”, un kestanedji i una blonda evropeana. Despues, tres filmos romantikos en 1928-29 kon el direktor R.S. Chaudhari - Madhuri (1928), Anarkali (1928) i Indira B.A. (1929) la metyo ensima de la fama en la era del sinema mudo.

Kon la venida de la boz a la teknolojiya sinematografika, Sulochana tuvo de tomar una poza en su karyera: kon esta mueva teknolojiya un aktor deviya avlar en Hindustani i Myers no konosiya afilu un byervo. Alora eya tomo un anyo de konje para ambezarse esta lingua. Un anyo despues, eya torno delantre de la kamera kon la version avlada de Madhuri (1932).

Eya kontinuyo kon otras versyones avladas de sus filmos mudos i kon Indira (1934), Anarkali (1935) i Bombay ki Billi (1936). Sulochana torno al mundo de sinema komo una bomba! Estava ganando un salaryo de 5000 Rupees por mes, teniya los otomobiles los mas elegantes (Chevrolet 1935) i uno de los eroes mas grande de la era silensioza, D. Billimoria, komo su amante kon ken lavoro entre 1933 y 1939. Eyos eran un kupl muy popular.

En medyo de la dekada de 1930, Myers avriyo Rubi Pics, una kompanyiya de produksyon de sinema.

Ma una vez ke su istorya de amor kon Billimoria se eskapo, se eskaparon tambyen sus karyeras. Sulochana desho el Imperial i las propozisyones de lavoro se apokaron. Aktrisas mas muevas, mas mansevas i mas kompetentes aviyan entrado en la shena. Myers aprovo de tornar kon rolos minores ma i estos fueron pokos.

En 1973, fue koronada kon el Premyo Dada Saheb Phalke, el premyo mas onorado del sinema, un premyo por su kontribusyon al sinema de India.

Myers muryo en 1983, muy prove i sola.

“Sulochana (Ruby Myers) no teniya afilu bastante moneda para pagar la kira de su kaza de una kamareta en Warden Road. Desidimos de ayudarle del Fondo de Benefisyo de “Filmfare Old Artists” aviya dicho el Sinyor Karanjia, un kritiko de sinema.

Otras damas djudias en el sinema de la India fueron Rose Ezra i Farhat Ezekiel Nadira. Todos veniyan de orijines djudios Bagdadis.

 

 

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın

İLGİLİ HABERLER

İLGİNİZİ ÇEKEBİLİR