La Eskalera De Kamondo

Dora NİYEGO Judeo-Espanyol
30 Ekim 2019 Çarşamba

La Eskalera de Kamondo en Karaköy tomo su istoria del amor de un avuelo por sus inietos.

Estambol es el paradizo de lugares istorikos. Las eskaleras en diferentes partes de la sivdad fasilitan el kamino en evitando de suvir las kolinas. Estas eskaleras azen una kontribusion a la ermozura de Estambol kon los peyzajes ke puedesh ver en suvyendo i en abashando. Diferentes rekuerdos se eksperimentan en estas eskaleras: muevos kazados toman fotografiyas, namorados komparten sus amor leshos de ojos kuryozos, otros travan filmos. Komo si ‘’Una istoria paso enriva de mi, ma yo dainda esto en piez’’ te dizen estas eskaleras.

Komo todos lo savemos, en Galata ay una eskalera konstruida al nombre de Abraham Salomon Kamondo de la famiya Kamondo, ke es una de las famiyas bankeras i la mas emportante de la rejion en la dekada de 1850. Esta eskalera kombina la kaye Voyvoda i la kaye Bankalar en Karaköy. La Eskalera Kamondo, komo las otras eskaleras, tiene una istoria.

En 2012, un ekipo etranjero vino a Estambol para filmar el filmo Skyfall de James Bond. El dublor de Bond, Robbie Madison izo munchos muvimientos akrobatikos kon su motor enriva la eskalera ke fue konstruida por el amor de un avuelo por sus inyetos.

Segun el investigator (araştırmacı), eskridor i istoriano Talha Uğurluel, la Eskalera Kamondo ke a las vezes la yaman ‘’La Eskalera de los Amantes’’, atira la atansion kon su forma spiral. La estruktura spiral fue preferada porke no se kaygan los ke estan suviendo i abashando. Segun Uğurluel, el arshitekto ke konstruizo esta eskalera puede ser ke no penso muncho por las kayeduras, porke la estruktura en zigzag era el karakteristiko del periodo baroko de akeyos anyos.

Talha Uğurluel esta diziendo ke esta eskalera, konstruida por Avram Kamondo, iva permeter sus inyetos ke meldavan en la eskola segondaria ostrika, de suvir ariva, i abashar abasho para ir i vinir de la eskola a sus kazas. Tambien iva fasilitar los levantenes ke bivian en akeyas partes, de ir a sus lavoros en Galata.

Mezmo ke el Tunel se aviya avrido, para ke las personas ke suviyan kolinas difisiles tomen un poko soluk, durante el reynado del Sultan Abdulaziz, esto estava leshos de la fonksion de la eskalera.

La eskalera fue konstruida en un sistema ‘’eklektiko’’. Uğurluel esta diziendo ke no puedemos deskrivir la Eskalera de Kamondo kon un solo arte arshitektiko komo el baroko, el ampir i el rokoko. “En el arte ke yamamos baroko, ay kontrastes komo las letras ‘s’ i ‘c’’’. Vinyendo al venten siglo, diferentes estilos neoklasikos i empirikos ke fueron akseptados en el Emperio Otomano se kombinaron i formaron un sistema “eklektiko” diferente. La Eskalera Kamondo fue kreada kon este arte ‘‘eklektiko’’.

 

 

 

Siz de yorumunuzu yapın

Tüm Yorumları Görün