İSAK ESKİNAZİ
Las istorias de Mabul (tufan) ke se eskrivyeron en Babel, paresen muncho a la ke esta eskrita en el “Bereshit”, aun ke tenga munchas diferensyas.
Ay komo tres diferentes eskritas sovre el MABUL. La leyenda de los Sumerios, la epopea de Gilgamish, la leyenda de Atrahasis, i lo ke esta eskrito en el “Bereshit”. Entre las leyendas de los Sumerios, la ke konosemos mas, es la epopea de Gilgamish, ke era uno de los primeros tekstos eskritos en letras kuneiformas (çivi yazısı) i ke fue deskuvyerto en 1872 por George Smith en la biblioteka del Rey Asiryo Asurbanibal en Ninova (oy al lado de Musul en Irak). Aparte de esta tavlia, en Ninova uvo mas tavlias eskritas 1000 anyos antes de la tavlia ke avlamos. Estas fueron eskritas en la lingua de los Sumerios ke egzistieron en el segundo milenium antes de muestra era.
La otra epopea de Babel, la de Atrahasis, es la deskuvierta la mas serkana. En 1956 se kompilo en su totalidad i no se save muy bien si la istoria del Mabul en esta epopea fue influensada de los Sumerios o si fue direktamente eskrita en Akadiano (lingua franka de akeya epoka) i lingua Semitika de Babilonya, eskrita en los anyos 1650/1600 antes de muestra era.
No olvidar ke tenemos una eskrita similar en Bereshit. (3/15), ama no devemos komparar la epopea de Gilgamish kon la perasha de Bereshit. El Mabul eskrito en Gilgamish se baza sovre la bushkedad de la immortalidad. Utnapishtim konta a Gilgamish ke se izo immortal, porke los dioses lo eskojeron para ke frague un arka (barko) i le eksplika ke el dio Ea, le pide de meter aryento del arka semiyas de todo lo ke es bivo i despues de una semana del Mabul, ke todo fue destruido, envio una palomba, una irondela i un kuervo. La paloma i la irondela tornaron al arka ama por fin el kuervo ke fue mandado mas despues no torno al arka. I es asi ke Utnapishtim entendio ke estava serka de la tierra.
Utnapishtim no avla porke razon akontesyo el Mabul. Lo ke el kere amostrar es ke no se yega a la immortalidad dela manera ke el la tuvo.
En la epopea de Atrahasis, el ero ke se yamava Ziusudra fue immortal despues de sobrebivir al Mabul. Komparando las razones del Mabul kon las del Bereshit, las de esta epopea son muy paresidas, en kontraryo de lo ke se avla en Gilgamish.
La solusyon es de kastigar el ombre por el mal komportamyendo kontra la moralidad. Esta epopea de Atrahasis mos da a pensar komo troko el mundo. Lo ke es muy evidente en el kavzo de Noah, es ke el Dio bendicho disho a Noah i a sus ijos de no matar umanos. Esto se repite tambien en los 10 devarim (mandamientos). La vida de un umano es sakrado. El ken salva un umano, salva el mundo entero.
Adaptado de un artikulo de Tikva Kensky, profesora en la Universidad de Chicago.
