El Pasharo Nasional De İsrael

Dora NİYEGO Judeo-Espanyol
13 Kasım 2019 Çarşamba

La abubiya ke es mensionada munchas vezes en las lejendas judias sovre el Rey Salomon i la Reyna de Saba, es un pasharo muy popular en Israel.

Segun la lejenda, la abubiya es kapavle de kortar piedras kon su piko (gaga). Mezmo si su piko se le rompe, la abubiya kontinua a kortar las piedras kon su kresta (ibik). Por esta razon, en ebreo, lo yaman ‘’du chifat’’ ke sinyifika ‘’dos pikos’’ en la lingua Aramea. Los judios de Etopia la yaman ‘’El Pasharo de Moshe’’ i se kreen ke la abubiya un diya los va yevar a Yerushalayim.

La abubiya no se espanta de las personas, ma kuando se siente en peligro, kita una boz de chuflete, i una agua se le vazya del puerpo.

Komo Israel es situado entre tres kontinentes, kada anyo, 500 miliones de pasharos pasan por sus sielos. Por esta razon, dizen ke Israel es el sentro de ‘’bird watching’’ en el mundo entero.

La abubiya es muy ekstendida en Evropa, Asia i en el norte de Afrika. En mezmo tiempo es el pasharo nasional de Italia. Entre munchas tribus afrikanos, nativos amerikanos i afganos, este pasharo es visto komo un sembolo kultural positivo. Ma en Fransia, la abubiya es konsiderada komo un pasharo bovo, i en la mitolojia grega simboliza el asasinato i la muerte.

La abubiya es distingida por su kuero de munchas kolores, su piko largo i kayido, sus kaveyos malena (yele) penyados para atras. Este pasharo konstruye su nido en los burakos de los arvoles, i kita un guezmo fedyendo para aleshar sus enimigos.

Por modo de su asosiasion kon el rey Salomon, tradisyonalmente, los israelianos pensan ke la abubiya tiene un ayre pozitivo. Segun el folklor judio, la abubiya ayudo al rey Salomon a irse a la reyna de Saba. Por modo ke el rey no estava seguro de la pureza i de los motivos de la reyna, Solomon se konfiyo al pasharo i a su konsejo. El rey tambien alavo las teknikas de obzervasion de la abubiya, i lo kalifyo komo “savio”.

La abubiya fue elejida komo el pasharo nasional del Estado de Israel en mayo del anyo 2008 en una eleksion kreada en las selebrasiones del sesenten aniversario del pais. 155.000 sivdadanos asistieron a este konkurso. Este konkurso nasional fue kreado para travar la atansion a la konservasion de la natura.

El karakter amistozo de la abubiya es el faktor ke la izo ganar en estas eleksiones. Entre los arvoles en la natura, de jenerasion en jenerasion, las abubiyas kaminaron lado kon lado kon las kreaturas Israelianas.

 

 

 

 

 

Siz de yorumunuzu yapın

Tüm Yorumları Görün