La Sinagoga Olvidada de Galata, Or Hadash

Judeo-Espanyol
11 Aralık 2019 Çarşamba

Kenan Cruz Çilli


En muestros tyempos, Galata, djunto kon Balat i Hasköy, es uno de las rejiones djudios mas importantes en la sivdad de Estambol. Serka de la kula de Galata se topan munchos de los kales mas famosos i mas ermozos de la sivdad. Sovre todo el Neve Şalom, kon sus bodas elegantes i famozas, i kon el muzeo djudio de Turkiya a su lado es una de las sinagogas mas grandes i espesyales en todo el payis. Komo Galata fue un lugar prinsipal de la vida djudia en Estambol, tambiyen se topan kales ke no aparteniyan a la komunidad sefardi. En Galata oy se topan tres sinagogas de la komunidad Ashkenazi, ma las kondisyones prezentes de todas las tres es muy diferente. Munchos en la komunidad djudia de Estambol i otros ke se interesan en la kultura i istoria djudia de la sivdad (komo yo) saven la sinagoga grande de Yüksekkaldırım ke oy es la unika sinagoga de los ashkenazis ke kontinua kon sus puertas avyertas komo un templo relijioso. Tambiyen munchos konosen el Schneidertempel ke oy funksyona komo un sentro kultural de las artes. Ma muncha djente no save ke tambiyen ay una sinagoga ashkenazi mas en Galata. Esta sinagoga olvidada se yama Or Hadash.

La primera vez ke yo vide este kal fue kuando estava aziendo investigasiones por mi tesis en la universidad. La kultura i istoriya djudia de Turkiya syempre fue una de las kozas mas interesantes para mi. Mismo ke no so djudio, empesi a ambezarme el ladino kon el jurnal El Amaneser. Klaro ke es mas kolay para mi porke mi lingua materna es el portugez djunto kon el turko. Kuando deskuvri la sinagoga Or Hadash en Galata fue muy emosiyonante porke la sinagoga esta en una kondisyon terrivle. Yo penso ke komo sivdadano turko es importante defender i prezervar todas las kulturas en este payis. I por mi, la Sinagoga Or Hadash es una parte muy importante de la istoriya i erensia djudia de Turkiya. Por esto yo empesi a pensar sovre lo ke puedo azer para ayudar kon la prezervasyon de esta sinagoga istorika. A la fin, desidi ke un bueno empesijo seria de eskrivir sovre la sinagoga para ke mas i mas personas en Turkiya i en el mundo se rendan kuento de la istoriya olvidada de esta sinagoga. Ya eskrivi sovre la sinagoga en Ingles i en Turko i esta vez pensi eskrivir un pokito en Judeo-Espanyol.

A la fin mi esperansa es de ver la sinagoga Or Hadash restorada i retornada al komunidad djudia de la sivdad. Un diya si se realiza esta esperensa, yo kreo ke una parte muy muy importante de la istoriya djudia de Estambol sera preservada i protejada. Tambiyen es posivle ke este kal pueda ser transformada e un sentro kultural, kon konsyertos i ekspozisyones de arte o de istoriya. Ma lo ke es mas importante es ke el Or Hadash no kontinue olvidada i ke mas i mas turistas, Turkos i estranjeros, vijiten esta sinagoga en el sentro del korazon de Galata. Mas una koza, komo yo esto muy enteresado en la istoriya de este kal, me azeria un grande plazer resivir notisyas de algen ke se akodre de los tiempos en ke esta sinagoga no estava abandonada. Si ay algen kon memoriyas ke me kere kontar, me puede eskrivir a: [email protected]. Grasyas.

 

 

 

 


Siz de yorumunuzu yapın

Tüm Yorumları Görün