30 Ekim 2020 Cuma 01:11

Un Espanto

Eliz GATENYO Judeo-Espanyol 1630 görüntüleme
11 Aralık 2019 Çarşamba

Ya vos aviya kontado ke el padre de mi esfuegra era el shefe de la estasyon de Dedeağaç. Akel tiempo, aya se yamava Dedeağaç, agora se yama Aleksandropolis.

Kuando nasyo mi esfuegra, akeyas partes dependiyan del Imperio Otomano, porke dainda no se aviya fundado la Republika Turka, la Turkiya.

La estasyon se topava en medyo de un kampo. Al entorno no aviya dinguna morada, dinguna botika. Kuando se eskuresiya era de espantar. Eyos moravan en el kat de ariva de la estasyon. En el kat de abasho se topavan el büro del shefe, los gishes para merkar bilyetos i un salon para ke los viyajadores asperen sus trenos.

Komo aya era un lugar asolado, el padre de mi esfuegra ke era un ombre alto i fursudo, teniya siempre un tufek i un revolver al lado. Las noches kaminavan los eshkiyas para arovar lo ke topavan.

Una noche, despues ke ya komyeron i se estavan aparejando para echarsen, oyeron un bruido abasho. El bruido estava kontinuando. Echaron tino, si! Era verdad, era un bruido fuerte. La puerta de la kaza se estava meneyando. Alguno estava sarsaneyando la puerta. Todos se ampesaron a espantar. No puediyan ni mirar por la ventana, por ke les puediyan echar un kurshun. El padre de mi esfuegra, metyo a la famiya entera en una kamareta den medyo. Tomo el tufek i la tabandja i ampeso a asperar detras de la puerta. La puerta estava meneyandose bien karar de fuerte. La estavan meneyando kon ensistensya. Taka Taka, taka taka…

La famiya entera estava asperando kon espanto. Kualo va ser? Ken va salir enfrente de mozotros? El bruido estava kalmandose en vezes i despues de kaje medya ora, estava ampesando demuevo. El padre de mi esfuegra aspero noche entera detras la puerta.

Bendicho el Dio ya ampeso a amaneser. Kaliya salir de kaza porke en serka ya ivan a ampesar a vinir los trenos. No uvo hayre, kon grande albon avriyo la puerta. Ke ve? Un perro grande echado ensima el paspas de la kaza. Povereto se estava araskando la espalda en fregandose a la puerta, porke teniya munchas pulgas.  De ande entendieron ke era este perro ke se arasko noche entera? Por ke kuando se esperto, en viendo al padre de mi esfuegra, kontinuo a araskarse.

Afita en vezes kozas ke mos emosyona o mos espanta muncho, i en verdad ke no es emportante del todo.

 

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın

İLGİLİ HABERLER

İLGİNİZİ ÇEKEBİLİR

GS3

Tünelin Ucu-İzel ROZENTAL

Tünelin Ucu-İzel ROZENTAL

Mozotros Ailesi- İrvin Mandel

Mozotros Ailesi- İrvin Mandel