30 Ekim 2020 Cuma 02:03

Kontınuasyon De La Semana Pasada

Eliz GATENYO Judeo-Espanyol 1527 görüntüleme
8 Ocak 2020 Çarşamba

La semana pasada vos ampesi a kontar la istorya de Perez el Marano. Para no enfasyarvos lo kije kontar en dos partidas. Agora vos konto el resto. Kedimos en lo ke el sinyor envito a Perez al seder de Pesah, ke ivan a fiestar a la noche sigiente.

La noche de Pesah, todos se arekojeron en el hol de la kaza i el Sinyor adelante se dirijaron verso una chika entradika. Perez los estava suivando. A la fin de la entradika aviya una eskalera muy estrecha ke abashava al bodrum. En lo ke entraron, Perez se enkanto de ver una sala muy grande i rika. En medyo de la sala aviya una meza aparejada kon kupas finas, chinis presyozos i kucharas i kandelares de plata.  Delantre de ande se asenta el balabay aviya un plato de dinimes tapado kon un tapon brodado kon letras en ivrit.

Kon grande alegriya meldaron i komieron. Djusto kuando ampesaron a kantar “El Kavretiko” ensupito toparon un enkizitor kon djuba i kukuleta blanka, delantre de eyos.

El enkizitor disho ke una mosa ke aviyan arondjado los denonso. Perez i el sinyor ampesaron a arogar al enkizitor de perdonarlos. El sinyor le prometyo un grande dono a la eglisya.

El enkizitor les disho: Mis amigos! Yo vos va salvar. Va eskrivir un raporto al tribunal de la enkizisyon. Va dizir ke no es verdad lo ke disho esta mosa. Amanyana la noche demuevo arekojevos aki i vos va dar haber de la salvasyon.

La noche sigiente lo asperaron al enkizitor kon emosyon. Kuando ampesaron la agada se aparesyo el enkizitor kon vistidos sivil, se asento a la meza i les disho ke ya estan en seguridad. 

El Sinyor le demando deke es ke les ayudo en siendo un enkizitor?

El enkizitor konto. Mi nono era el talmudisto famozo Rabbi Moshe Del Mediko. En el tiempo del dekreto fue kemado. Akeyos diyas mi padre estava en viaje. Kuando torno no topo a dingunos de su famiya. Mi padre se konvertio i ansina salvo a su famiya. El diya ke tuve yo 13 anyos me konto toda la istroya de muestra famiya. En lo ke tuve 16 anyos me tomo enfrente i me disho. Mira ijo miyo, ya vino el diya de eskojer tu kariera. Tengo una propozisyon: Te vas a azer el anjelo de tu puevlo i los vas a protejar.  Vas a azer estudios de relijion kristiana i ansina te  vas a enlalteser en el orden de los papazes i te vas a azer miembro del tribunal de la Enkizisyon. Ansina vas a pueder salvar a tu puevlo. Pishin aksepti i kon la ayuda del Dyo arivi a mi buto. Salvi munchas almas komo vos salvi oy. Agora kontinuaremos al seder! Meldaron la agada, komieron i bevyeron i kantaron i despues se espartyeron del enkizitor en abrasandosen.

A la fin de la istorya el Sinyor kazo a su ija kon Peres. Vendyo todo el bien ke teniya i todos emigraron a Salonik.

Eskapo? No! Los superiores del tribunal ampesaron a supsonar la traizion de este papaz por ke resentieron ke estava ayudando a los suspektos. El enkizitor entendyo ke no va tener repozo, se fuyo de Espanya i se fue al lado de la famiya de Peres i se enstalo en Salonik tanbien.

 

 

 

 

 

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın

İLGİLİ HABERLER

İLGİNİZİ ÇEKEBİLİR

GS3

Tünelin Ucu-İzel ROZENTAL

Tünelin Ucu-İzel ROZENTAL

Mozotros Ailesi- İrvin Mandel

Mozotros Ailesi- İrvin Mandel