30 Ekim 2020 Cuma 00:57

Las Talikas En Las Islas

Eliz GATENYO Judeo-Espanyol 1651 görüntüleme
29 Ocak 2020 Çarşamba

Oy vos kero avlar de las talikas i sovre todo de los kavayos ke las travan. Las talikas son una parte de la kultura de las islas de Estambol. No solo de las islas, tanbien i de otras sivdades komo Izmir, Antalya i otras. I tanbien de otros payizes. En los Estados Unidos, New York Central Park, en Ingletierra, Londra i mas otras sivdades. No ay turisto ke vijita estos lugares i no aze un turiziko kon estas talikas.

Ay unos kuantos anyos ke las Islas de Estambol estan “okupadas” por los turistos. Estos mas no se yaman turistos o vijitadores, los yamamos okupantes. Los ke tienen botikas estan muy kontentes, porke los turistos deshan paras, ma para los ke moran en las islas esta un ginnam ke no puedemos ni abashar a bever un chay en el debarkader.

Estos turistos la primera koza ke azen es alkilar una talika i azer el torno de las Islas. El torno de la Isla es 12 km. Las islas son kon munchas suvidas. Kada talika toma 4 personas. Los kocheros para ganar mas muncho toman en vezes 6-7 personas i se meten en kamino i los azen koryer a estos kavayos en las suvidas, en las kalores. Les kitan las grenyas de los poveretos kavayos. Ay en vezes ke vemos kavayos ke kayeron en basho porke ya no pueden mas dar ni un paso. Esto aze revoltar a las personas. Este anyo se izieron i hazinos, una hazinura epidemika ke pasa i a las personas. Las munisipalidades, las organizasyones siviles i las asosyasyones de los derechos de los animales, desidaron de alevantar las talikas en las islas i meter arabas kon elektrisidad.

Vos kero avlar de otra koza. A los ke se engrandesyeron i biven en las islas les va vinir muncho a mankar este manko de las talikas. Sin abuzar, estos kavayos son bestias ke kreó el Sinyor del Mundo para mozotros las personas. En la Tora dize “Vos esto dando estas bestias para ke vos ayuden, ama i vozotros los vash a protejar”. Los kreo para ke mos aprovechemos de sus fuersas. Ke aziyan antes de enventar las karosas, los otomobiles? Kómo izieron tantas gerras antes ke enventaron los jeepes i los tankes? Mizmo la fuersa de los motores no se mezuran kon “fuersa de kavayo”? Vash a dizir, agora es otro tiempo. Kale utilizar la teknolojiya. Si! Ya esto de akordo. Kuando miramos las fotos dal tiempo no dizimos, “ke ermozos tiempos ke eran”? Kero dizir ke no me gusta alevantar por entero estas talikas. Es nostaljiya. En primero kale ke los “arabadjis”, karoseros seyan edukados. Ke no les kiten la alma de los kavayos para ganar paras mas, mas i mas. Agora la munisipalidad de Estambol desido de merkar las karosas i los kavayos. Vinyendo a los kavayos,  los van a deshar a la natura. Malorozamente estos kavayos no son auzados a bivir solos en la natura, ke pekado!

Yo digo ke las talikas son el simbolo de las islas. Es difisil de imajinarlas sin eyas. Los minibuses kon elektrisidad ke van a meter, no estan “yakisheyando” a “Muestras Adas”. No se, puede ser ke mos auzamos kon tiempo.

 

 

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın

İLGİLİ HABERLER

İLGİNİZİ ÇEKEBİLİR

GS3

Tünelin Ucu-İzel ROZENTAL

Tünelin Ucu-İzel ROZENTAL

Mozotros Ailesi- İrvin Mandel

Mozotros Ailesi- İrvin Mandel