24 Ekim 2020 Cumartesi 23:20

Kuando se avla muncho de hazinuras, se deve avlar de pıshkados!

Metin DELEVİ Judeo-Espanyol 2299 görüntüleme
18 Mart 2020 Çarşamba

Es un uzo sefaradi, kuando se avla muncho de hazinuras se korta la palavra para trokar el sujeto i se avla de pishkados… I agora una istorya de pishkados!

La sorprendente istorya djudia de “Fish and chips”.

Vos va vinir komo una sorpreza meldando ke el pishkado kon patatas fritas, aunke muy popular en Inglatierra desde una eternidad, en realidad era una spesyalidad de los djudios sefaradis portugezes ke fuyeron de la Enkizisyon en el siglo XVI i toparon refujyo en las Islas Britanikos. El famozo chef Jamie Oliver se refero a este kavzo serkamente en un artikulo en The New York Times, i en kontinuando eskrivyo ke “los platos evolusyonan, influensados por el komersyo, la gerra, la ambre i otras syenes de fuersas”.

Entre estas “otras fuersas” se topan los platos nasidos del ritual relijyozo. Para los djudios observantes, el pishkado es “parve”, un alimento nötr en la terminolojiya de kasherut, por lo tanto, es una manera fasil para evitar el taref (alimento no kasher) i ansi es posivle de meter produktos de leche en la mizma komida. Fue spesyalmente importante para los Marranos o kripto-djudios, ke asemejaron ser kristianos durante la Enkizisyon. Komiyan pishkado los dias de Vyernes, (para los Kristiyanos observantes es defendido de komer karne dia de Vyernes), i tanbyen deshavan un poko para komer yelado el dia de Shabat i ansi evitar de uzar el orno en Shabat.

Friyir era natural para los gizanderos djudios, i kuando la komunidad djudia empeso a enfloreser en la Inglatierra, se esperto en mizmo tyempo su amor por su kerido pishkado frito. Segun “El livro de la komida djudia” de Claudia Roden, Thomas Jefferson disho ke en un viaje a Londra komyo “pishkado al stilo djudio” durante su vijita. Alexis Soyer, un kozinero fransez ke se izo un chef famozo en la Inglatierra viktoryana, metyo una resefta de “Pishkado frito, en modo djudio” en la primera edisyon de su livro de kozina de 1845. “Una kozina de un Schilling para el puevlo”. La resefta de Soyer dize ke la “manera djudia” es el uzo de azete al lugar de godrura de karne (probablamente karne de puerko), lo ke izo ke el plato era mas savrozo ma mas karo.

Egziste syerta disputa sovre el lugar i el momento de las “patatas fritas”. Munchos istoriadores dizen ke las patatas fritas fueron inventadas en Beljika i substituyeron el pishkado en tyempos difisiles. La primera vez ke se uzo la palavra “patatas fritas o chips” fue en “Un kuento de dos sivdades” de Charles Dickens en 1859: “patatas fritas, chipses fritas kon unas kuantas gotas de azete”.

La kombinasyon ofisyal de pishkado i chips fritas akontesyo unos kuantos anyos mas tadre. Aunke ay algunos ke no estan de akordo, la mayoriya de las otoridades dizen ke es grasyas a un kozinero djudio, esta vez un joven imigrante Ashkenazi ke se yamava Joseph Malin, ke avriyo la primera botika britanika de chips, tambyen konosida komo “fish and chips”, en Londra en 1863. La botika tuvo tanta reushita ke lavoro asta los anyos 1970.

Ken podiya imajinarse ke los temerozos imigrantes djudios ke guadravan su verdadera relijyon i pratikavan en sekreto seriyan los responsavles de krear uno de los platos mas ikonikos de Ingletierra? El plato ke Winston Churchill afirmo ayudar a los britanikos a venser a los nazis, la komida rekonfortante ke George Orwell disho ayuda a mantener a las masas orozos i “evito la revolusyon”. El plato, ke estava entre los unikos alimentos ke nunka se rasyono durante la gerra porke el governo britaniko penso ke prezervar el akseso a esta komida era una forma de mantener el moral. Un plato ke dayinda es un pilar de la gastronomiya britanika.

Pensa a esta istorya kuando la proksima vez vash a komer esta delisyoza komida djudia- britanika.

Adaptado de JTA

 

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın

İLGİLİ HABERLER

İLGİNİZİ ÇEKEBİLİR