24 Ekim 2020 Cumartesi 23:02

Los djudios i las pandemiyas a lo largo de la istorya

Metin DELEVİ Judeo-Espanyol 3792 görüntüleme
24 Mart 2020 Salı

Una vez ke el virus mortal empeso a propajarse en el mundo entero, las komunidades devastadas lucharon para afrontar una pandemiya ke no entendiyan kompletamente la razon. Pishin empesaron a mostrar kon el dedo kuando la djente bushkavan un kulpavle: los djudios.

Era el medyo del siglo XIV, i la landre (pesta) yamado la muerte preta aviya empesado a devastar la Evropa. A la fin, kaji el 1/3 de la povlasyon topo la muerte. Se propajaron rumores ke esta matansina era el rezultado de una konspirasyon djudia, i ansi los djudios sufriyeron una terrivle persekusyon.

"Kuando ay grandes epidemiyas, la djente se espanta", disho Martin J. Blaser, de la Universidad de Rutgers, istoriador i profesor de medisina i mikrobiolojiya. “En jeneral bushkan a akuzar a algun tipo etranjero o musafires non envitados. Esto es lo ke akontesyo kon los djudios".

En todo el kontinente evropeo, se diziya ke los djudios estavan entosegando pozos kon la landre-pesta. Blaser disho ke ay evidensya ke las komunidades djudias evropeas fueron masakradas durante este tyempo, un peryodo ke deskrivyo komo "la mas grande persekusyon de los djudios" antes del Olokosto.

Una orijen de la teoriya de la konspirasyon puede aver sido bazado sovre las proporsyones de mortalidad mas bashas en las komunidades djudias. Blaser disho ke podria ser relasyonado kon el fakto ke, a lo manko una vez al anyo, los djudios alimpyavan sus depos de sereal pormo de Pesah, aminguando las posibilidades de estar ekspozados a los ratones, portadores de esta hazinura.

Desde la Muerte Negra asta la epidemiya de sarampiyon en 2019, los djudios fueron utilizados komo kavras de pekado para las epidemiyas, disho Blaser.

Los djudios en la sivdad de Nueva York fueron kulpados por la epidemiya de sarampiyon del anyo pasado, ke afekto disproporsyonalmente las komunidades djudias ortodoksas. Los fonksyonaryos  de la salud kreyen ke se propajo mas fasilmente en la komunidad devido a la grande kantidad de kriyaturas en kada famiya, los viyajes enternasyonales largos i la chika proporsyon de vaksinasyon. La Liga Antidifamasyon, ADL informo una pujita en los insidentes antisemitas relasyonados kon la epidemiya.

Kuryozamente, parese ke los djudios no fueron akulpados de la gripa espanyola de 1918-19, la pandemiya de gripa ke mato a unos 50 milyones de personas en todo el mundo. A la kontra, los djudios fueron aktores emportantes en la lucha. El departamento de salud de San Francisco estava dirijido por unos kuantos djudios, inkluzo Lawrence Arnstein, ke ayudo a organizar la repuesta del  departamento de salud a la hazinura. Matilda Esberg, presidente de la Kongregasyon Emanu-El Sisterhood, tanbyen partisipo en la supervizyon de la repuesta.

Durante la aktual pandemiya de coronavirus, chinos i asiatikos fueron enkulpados i diskriminados porke la hazinura empeso en China. Los amerikanos de orijin asiatiko devyeron afrontar atakos rasistos, i se sintyo ke sus klientes se apokaron. Esto ne kere dizir ke los djudios fueron olvidados durante esta epidemiya!

Blaser ve paralelos a la forma en ke los djudios fueron tratados durante las epidemiyas pasados.

"Es la mizma mentalidad de estos negro mazales", disho Blaser. “Topar una viktima. Malorozamente para los chinos, asta agora eyos fueron los mas afektados ".

Adaptado de Jewish News of Northern California

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın

İLGİLİ HABERLER

İLGİNİZİ ÇEKEBİLİR