20 Ocak 2021 Çarşamba 06:15
2n14

La epidemia del corona virus

Şeli GAON Judeo-Espanyol 4198 görüntüleme
31 Mart 2020 Salı

Keridos Lektores,

Oy todos los paises del mundo entero estan enkarselados en sus kazas a kavza del “Corona” virus. Este virus mortal tan chiko izo lo ke no pudo azer las gerras mondiales ande se muryeron miliones de personas. Este virus sin tokar a los chikos esta matando a los aedados. Estash vyendo komo de entelijensya?

Komo estamos en kaza, la televizyon esta avyerta dia entero para sintir todas las novelas del pais i del mundo entero. En una de las avlas oyi ke komo el mundo esta muy yeno de djente, kale aminguar un poko el puevlo, i este virus salyo para ke los ke tyenen mas de 65 anyos se mueran i deshen el lugar a los mansevos. A ke dias vino el mundo?

Yo penso ke es una punisyon a la umanita entera.  La manera ke estamos bivyendo, viyajando, vistyendo, merkando kozas muevas, komyendo, en avyendo tantas personas ambyertas, desmudos i en una difikulta para pueder kontinuar a bivir: no tyenen kazas, estan en los kampos kon las bestyas, echandosen en basho, komyendo yervas i otras kozas muy dezmazaladas… no tenemos derecho de bivir esta manera sin pensar a los otros, pensando solo a muestra famiya i a muestro entorno, esto no es etiko, no es igualita.

Esto es un egoismo profondo malorosamente.

No kedo kerensya al den frente, no kedo respekto a los grandes, no kedo toleransya a los aedados, no kedo apiadamyento a los menesterozos. Los ijos no keren mirar a los paryentes, los estan metyendo a las kazas de los aedados i no se estan okupando mas de eyos.

Estamos bivyendo unos dias areskuros, sin saver lo ke mos va vinir a la kavesa en el avenir, una vida sin piyada i kruela, ke esta vida mos esta dando unas lesones ke estamos entendyendo ke nada no tyene emportansa mas ke la salud.

Akel tyempo estamos realizando ke la rikeza no tyene dinguna emportansa. En estos dias estamos vyendo ke el riko kon el prove esta igual. Estamos sin remedyo. Ay una dicha:

“Mal de todos no es mal” ma corona mos esta serrando las alas del korason. En esta situasyon ke no mos estamos pudyendo ver ni kon los ijos, ni kon los paryentes, ni kon los amigos estamos realizando la valor de la solidaridad, la valor de partajar kon los otros, i estamos dando loores al Dyo ke estamos en muestras kazas kayentes i artos.

No me esto puedyendo detener de pensar a “Anne Frank” ke bivyo dos anyos en una kamareta chika sola, sin komer muncho, eskrivyendo sus rekuerdos… Kale ser optimistos ma en esta situasyon esta difisil. Noche de shabat, los ijos no pudyeron vinir. Mansevos komo aedados se estan espantando de salir. Ya vyene Pesah. No kreygo ke las famiyas van a pueder arrekojersen i azer la Agada kon un montante de djente, una meza kon kinze personas… Bivir i ver… Mas vale murir ke estar solos sin el entorno. No tenemos mas ke arrogar al Dyo piadoso ke este virus se desapareska lo mas presto posivle i puederemos kontinuar una vida mueva yena de  salud, kerensya, respekto i adjuntamyento todo el mundo.

Keridos Lektores fue una eskrita un poko pesimista ma kije partajar mis sintimyentos kon vozotros. Al vermos en dias Buenos…

      

         

             

                                                      

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın

İLGİLİ HABERLER

İLGİNİZİ ÇEKEBİLİR

GZ

MOZOTROS AİLESİ

MOZOTROS AİLESİ

TÜNELİN UCU

TÜNELİN UCU