A Hyman Lipman de Filadelfiya se le akordo una patent para un kalem kon una goma para efasar en su punta detras el 30 Marso 1858. El patent era para el instrumento ke serviya para eskrivir, chizdeyar o pintar ke konsiste en un pedaso delgado i largo jeneralmente de tavla, kon una mina silendriko fino de grafit u otra substensya mineral adyentro ke sale de una punta de esta tavla kuando esta aguzado i una goma para efasar en la otra punta. I el grafito komo la goma de efasar del kalem se podian aguzar. Lipman tanbyen fundyo la primera kompanyia de anvelopes en los Estados Unidos, en 1843, i merko un patent por kartpostales, kreado en 1861 por John P. Charlton. Las kartpostales de Lipman teniyan un bodre dekorado i no tenian fotos del todo, solo un espasyo vaziyo para eskrivir. I estas kartpostales se izyeron las primeras kartas otorizadas ke se podiyan enbiyarse sin anvelop por la posta, en el anyo 1870. (El Ofis Nasyonal de Posta de los Estados Unidos emityo la suya tres anyos despues). En 1862, Lipman vendyo su patent de kalem kon goma a Joseph Reckendorfer por $100,000, i Reckendorfer se fue al djuzgo para demandar una indemnita i aretar su produksyon a la kompaniya de kalemes Faber por enfraksyon de patent. Ma en 1875, la Korte Suprema desidyo i deklaro ke el patent no era valivle porke el envento de Lipman era simplemente una kombinasyon de dos entidades konosidas de antes. El kalem moderno probablemente fue enventado verso la fin del siglo XVI; antes de esto, el “penicillum” era “una chika furcha echa kon un tubo de tavla inchida de pelos de animales alinyados i enderechados suanyozemente”, segun Jamie Phillips, del Sentro para el Livro de Pensilvanya. En los Estados Unidos, el 30 de Marso fue deklarado el Dia Nasyonal de Kalemes…
La sentensiya de la Korte Suprema era: “Una kombinasyon, para resivir un patent, deve produsir una fuersa o efekto diferente o dar komo rezultado fuersas o prosesos kombinados de los dados por sus partes separadas. Deve de aver un muevo rezultado produzido por su union; si no es ansí, es solo una agregasyon de elementos separados”. Tribunal Supremo, Reckendorfer v. Faber, 1875
