1 Mart 2021 Pazartesi 01:23
vakko
vakko

EL SEKRETO DE LA UNIDAD DEL PUEVLO JUDYO

Dora NİYEGO Judeo-Espanyol 1450 görüntüleme Sesli Dinle
28 Nisan 2020 Salı

En un artikolo ke meldi, el eskritor esta bushkando la repuesta a la kestyon:  ‘Kualo es el sekreto detras la unidad del puevlo judyo?’

En una asamblea a la kual reprezentantes de munchas komunidades judias asistyeron, el eskritor remarko ke todos estan muy diferentes de unos a los otros. Ombres vistidos de kostumes tradisyoneles ultra ortodoksos, mujeres modernas en vistimyentas luksozas i talones altos, ekstrem liberales, mansevos profesyonales en sus ventes, retirados en sus sesentas.

Komo pueden estas personas tan diferentes komo forma de vida, anyos, i opinyones unirsen en una sola boz en el mundo entero, ‘la boz de los judios’?

La istorya de los judios empeso kon las dodje tribus ke desharon Ejipto, i formaron una aliansa kon el Dio en el monte Sinai.

La tradision de los judyos siempre fue la tradisyon de un solo Dio, mezmo ke uvo diversas opiniones sovre lo ke este Dio kere dizir.

La unidad judiya es bazada en la lejitimidad de diskusyones, de diferensyas, i en muestra kapasidad de estar dakordo, u de pueder eksplikar al otro kon ken no esta dakordo.

El eskritor esta kontando una istorya en su artikolo:

"Un rey ke biviya en armoniya kon sus sivdadanos judyos, fue konvensido por uno de sus konsejeros ke en un imperyo no deve de aver diferensyas entre la djente. I ansi, este konsejero lo konvensyo de forsar a los judyos de konvertirsen a sus relijyon.

Un diya, un fabrikante de tapetes trusho dos tapetes al rey i le disho de eskojer uno.

El primer tapet era de kolor kolorada i kon muy ermozas figuras enriva; uno de los mas ermozos tapetes ke el rey aviya visto fin akel diya.

El rey fue empresyonado de esta ovra ma su kuryozidad por ver el otro tapet fue mas grande.

El sigundo tapet estava brodado kon kolores diferentes, kon diversas figuras delikadas, i kon munchos detalyos. Los ilos utilizados eran de oro, de plata, i de kovre. Paresiya ser una ovra de arte.

Furyozo el rey le disho; ‘Ya saviyas ke iva eskojer el sigundo tapet. Deke me ensultates en amostrandome los dos?’

El vendedor le respondyo; ‘Sinyor Rey, el sigundo tapet es su reynado riko de diversidad, i de kapasidad. El primer tapet es lo ke su reynado va ser si oye las palavras de su konsejero, i todo lo ke es espesyal, todo lo ke es diferente, todo lo ke lo aze uniko a su estado va dispareser".

El rey entendyo el yerro ke iva azer.

La ermozura del puevlo judyo es komo este tapet. En este tapet, los ilos de diferentes kolores, i de diferentes matieryales se ataron unos kon los otros, i una ovra de arte salyo en medio.

La kapasidad de reunir los miembros de las komunidades judyas del mundo entero, mezmo syendo tan diferentes; pueder partisipar en un diyalogo sin violensya; esto es la ermozura de la unidad judiya.

Vyendo los konfliktos entre los shiis i los sunnis, entre el Fatah i Hamas ke son ermanos, puedemos entender komo de presyozo es el dialogo entre los judyos.

Muestra tradisyon de dialogo, i de diskusion es muy poderoza. Esta unidad ke mos vyene de muestra diversidad, es muestro orgolyo. Muestra abilidad de ser respektuozos unos a los otros, es la baza de muestra tradisyon, i de la edukasion judiya. Esto es el sekreto de la unidad del puevlo judyo.

 

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın

İLGİLİ HABERLER

İLGİNİZİ ÇEKEBİLİR

GZ

MOZOTROS AİLESİ

MOZOTROS AİLESİ

TÜNELİN UCU

TÜNELİN UCU