24 Ekim 2020 Cumartesi 23:05

Lo Ke Afito a los Djudios en el Norte Afrika durante la Shoah

Metin DELEVİ Judeo-Espanyol 3279 görüntüleme Sesli Dinle
28 Nisan 2020 Salı

El 21 de este mez, mas egzaktamente el 27 de Nissan a la djudia, era Yom Hazikaron laShoah ve laG’vurah, komo se konose en kurto komo Yom Hashoah. Anyos i anyos se avlo i se eskrivyo sovre lo ke afito a muestros ermanos en la Evropa. En los anyos 2000 se empeso a avlar sovre los Sefaradis en la Shoah i grasyas a Haim Vidal Sephiha (z”l) i Michel Azaria se metyo una laja en Judeo-Espanyol en Auschwitz. Ma no se pensava ni se avlava muncho sovre muestros ermanos del Norte de Afrika durante la Shoah. En los anyos de alkavo se empeso a avlar de este kavzo i kontraryamente a lo ke pensavamos, mos ambezimos ke i en el Norte de Afrika, los djudios sufriyeron durante la Shoah. Vos kero dar en kurto syertas enformasyones sovre este sujeto.

Durante la Shoah (el byervo Olokosto tyene otro senso, esto preferando empleyar el byervo Shoah), los djudios evropeos fueron desimados kaji kompletamente i la emportansa de partajar esta istorya se esta azyendo mas emportante porke estamos perdyendo los ultimos testigos sovrebivyentes de los orrores de la Segunda Gerra Mundial. Uno de los kavzos mas poko konosidos sovre la Shoah es ke los djudios del norte de Afrika (Maroko, Algeria i partikularamente Tunisia i Libya ) tambyen fueron afektados por la salvajeria de los Nazis.

Komo Maroko i Algeria eran territorios kontrolados por los fransezes, kayeron debasho el kontrol del governo de Vichy, aliado de los Nazis. En estos paizes, la povlasyon djudia se vido konfrontada por las leyes restriktivas, konfiskasyon de propiedades, la ovligasyon de uzar una Estreya de David, un Magen David amariyo, i, para unos kuantos miles de djudios, lavoros forsados. Devemos sinyalar aki ke ay rumores ke uvo una opozisyon emportante a estas leyes antisemitas de la parte del Rey de Maroko, ke disho “No ay djudios en Maroko. Solo ay sujetos marokanos". (Se deve saver ke dayinda se diskuta si esto es verdad o no). Uvo restriksyones i leyes similaryas en Libya, ke entonses estava debasho el kontrol de los italianos fashistos.

Ma los djudios de Tunisia, bivyeron la okupasyon de la armada almana i SS. En Novembre de 1942, los Almanes entraron en Tunisia, imedyatamente empesaron a implementar sus leyes antisemitas abituales. Por demaziya de las restriksyones impuestas a los djudios en otras komunidades del norte de Afrika, los djudios de Tunisia (i los de la sivdad Tunis en partikular) deviyan krear un Judenrat (el komite de auto-governo djudio). El Judenrat fue responsavle de elijir a los djudios para embiyarlos a los kampos de lavoro forsado. Segun el Yad Vashem, kaji 5000 ombres djudios fueron embiyados a zonas de lavoro forsado. Munchos djudios del norte de Afrika, de edad 18 a 45, fueron embiyados a lavorar para konstruir rayes para el treno Trans-Sahara i bivyeron kondisyones de vida i lavoro ekstremamente difisiles.  Sovre esta istorya vos konsejo de meldar el livro de Albert Memmi. 

En Libya, okupada por los Italyanos i Alemanes, un grupo de djudios fueron mandados a Auschwitz-Birkenau.

Ma, la okupasyon almana i italyana en el norte de Afrika fue bastante kurta. En Novembre de 1942, las fuerzas aliadas desembarkaron en Maroko i Algeria. En este desembarkamyento la rezistensya djudia en estos paizes ayudo muncho a la armada aliada. I en Mayo de 1943, los alemanes se retiraron de la Afrika del Norte..

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın

İLGİLİ HABERLER

İLGİNİZİ ÇEKEBİLİR