Una Sientifika Mundial: Prof. Dr. İvet Bahar

Esti SAUL Judeo-Espanyol
6 Mayıs 2020 Çarşamba

En El Amaneser no. 170 aviyash meldado sovre el premio de onor ke muestra profesora Ivet Bahar aviya sido otorgada por la Universita Kadir Has en el departamento de Biolojiya.

La semana pasada una onor aun mas grande le fue otorgada a la kerida profesora por la Akademia de Siensias Nasyonal de los Estados Unidos. Por primera vez en 157 anyos una profesora turka fue eskojida para ser miembro de esta Akademia por su lavoro eksepsional en las siensias.

En estos dias la Prof. Ivet Bahar, ke es la fundadora del departamento de "Sistemas Biolojikas kon Ayuda de Komputadoras" en la Fakulta de Medisina en la Universita de Pittsburg, esta lavorando sovre dizenyos de kuras.

Despues de terminar Boğaziçi Universidad, fue profesora durante 16 anyos en esta universidad. En 2001, fue yamada a los Estados Unidos a la Universita de Pittsburgh. Lavora en el Departamento de Biolojia de Sistema komo presidente fundadora i profesora elita.

 

Un otro detalyo: Prof. Dr. İvet Bahar es ermuera de muestra grande eskrivana i poeta Beki Bahar z”l.

 

La novela agradavle de su nominasyon a la Akademia de Siensias Nasyonal de los Estados Unidosfue anonsiada por la televizyon turka i eskrita en kaji todos los jurnales. Semos gloriosos de sus performansas, una vez mas.

Le suetamos buena suerte por sus projektos i esforsos de sirvir la umanita.

Kerida Ivet, te rengrasiamos i te felisitamos por alegrarmos en estos dias de difikultades.

 

Siz de yorumunuzu yapın

Tüm Yorumları Görün