3 Mart 2021 Çarşamba 15:27
vakko
vakko

DESPUES DE LA CORONA

Forti BAROKAS Judeo-Espanyol 3430 görüntüleme
6 Mayıs 2020 Çarşamba

Yo ay kaji 45 diyas ke esto en kaza. Los primeros diyas estuve komo un pishkado salido de la mar. En un punto todo se anulo i kedo el mundo. Komo so una persona muy programada, de lunes a vyernes, kualo va empleyar, kualo va gizar, ande me va ir, ken va vinir todo esta programado. Mis ijos se burlan de mi ma yo no me va trokar de agora endelantre.  Yo se ke lunes tengo reunyon de ovras, martes tengo fikso kon amigas de anyos, myerkoles kurso, djugeves empleyar i reunion kon otras amigas, vyernes kuafor i ir ande los ijos, seya ande el grande seya ande el chiko, ver a los inyetos, shabat i alhad si ay un filmo ermozo ir al sinema, teatro, konser i komer en un kafe kon las amigas, lo ke mos dyo el Dyo. I munchos diyas envitasyones de tefilin, fashaduras, aniversaryos. El 12 de marso salyo la ley de serrar las eskolas, detras kafes, kuafores, botikas i mas. I detras pishin ya salyo la ley de no salir a la kaye para los ke son de 65 anyos i mas. Yo i mis amigas komo entramos a esta kategoriya komo diziya mi madre, “mos se asento el kayik”.

Mal de todos no es mal; lo tomi a pasensya i empesi a pensar komo van a pasar los diyas. Primeros diyas meldi, eskrivi, oyi muzika, vide filmos, seriyas de TV. Orozamente ke tengo Netflix. Empesimos a darmos nombres de filmos ke no topimos kavo. Ma kuando empeso a alargar i a vinir haberes non buenos de konosidos i keridos, a poko a poko el moral empeso a deprimirse, empeso un espanto i una paranoya dezgrasyada. Por egzemplo, lavar las bolsas ke vino del market, enshavonar bokales de agua i de soda, meter las frutas i los vejetales kon vinagre en mojo, lavar las manos no se kere dicho.

Siguro ke todos keremos ke se eskape una ora mas antes esta bela. 

Agora aboltaremos el madalyon i miraremos kualo vamos a peryer kuando se va eskapar esta maldicha pandemiya.

Ken save si vamos a avlar diya i noche kon amigas ke no mos vimos anyos, azer los moedes kon la famiya ke estan kada uno en una parte del mundo, ken save si va kontinuar las derashas i las orasyones de los raves ke mos kitaron de hova, yo lo djusto aviya anyos ke no oyiya una tefila de demanyana i topi muncho plazer en aziendo dezayuno en oyendo orasyon. Las derashas mos ambezo munchas kozas ke no saviyamos, i las noches kon los programes seya de muzika seya de konferensyas mos izo pasar la ora. Esto todo mos auno i mos ambezo una solidarita ke atorgare ya la aviyamos pedrida.

Keridos ermanos kuando va eskapar esta karantina i vamos a empesar a la vida diaryo, vos rogo no mos olvidaremos de estos diyas eskuros, no peryeremos la amistad ke topimos, no peryeremos esta kerensya i no peryeremos esta ermozura ke la topimos achakes de la corona. 

Kedavos en las buenas oras kon sanedad.

 

  

 

 

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın

İLGİLİ HABERLER

İLGİNİZİ ÇEKEBİLİR