30 Ekim 2020 Cuma 01:32

LA LUZ

Eliz GATENYO Judeo-Espanyol 1539 görüntüleme
13 Mayıs 2020 Çarşamba

Oy vos va azer el rezumen de un video ke  vide en el internet. Este video fue eskrito por Adina Stilerman, en franses. 

Esto enserrada en mi kaza en estos diyas, ma mis penseryos no! Se fuyen por aki por aya, a la China, a la Italia,  a Israel, a los sentros komersiales, a los aeropuertos, a las eskolas. Todo kedo. Me demando kuando todo se va eskapar, kualas sosietas van a sovrebivir? Kualas komunitas van a sovrebivir? Ken de entre mozotros va sovrebivir? El mundo va tornar a lo normal? Dingunos no tienen una repuesta en este momento. Estamos kaminando en una oskuridad totala. Alguno puedera azermos una chika luz? 

Una chika kandela puede kemar muncho tiempo en un mundo areskuro. Me demando siempre si es por esto ke los judios son tanto atados a las kandelas i a la lumbre. 

Asendemos lumbres desde miles de anyos. Azemos entrar Shabat kon la lumbre i kuando sale, la akompanyamos kon la lumbre. I azemos lo mezmo en Rosh Ashana, Yom Kipur i en las otras fiestas de el anyo entero. En Hanuka una semana entera asendemos kandelas. En Lag Baomer asendemos lumbres, meduras en todos los lugares. En kada kal tenemos una chika flama ke kema siempre. I tanbien leshos de aki kuando la djente muere, asendemos una kandelika para akodrarmos de eyos. 

Ke es este amor ke tenemos kon la lumbre? 

En el universo todo ampeso kon la luz.  Si el sol no egzistiya, de ande iva vinir esta luz? Esta luz es la luz fuerte del mundo spiritual. Muestra alma es komo un espejo ke refleta la spiritualitad de la vida. Alora deke la alma de la persona se kompara kon una kandela? 

El mundo fue kreado kon 4 elementos: La Agua, El Ayre, La Tierra i La Lumbre. Kada uno de estos elementos tiene su propya i unika direksyon. 

La agua korye para abasho. El ayre se va por todas las direksyones. La tierra es pasiva, no se meneya sin ke ayga una fuersa de afuera. La natura de la lumbre es de suvir a los sielos komo la alma umana. 

Las flamas respiran i se engrandesen. Eyas luchan kontra la oskuridad, i finalmente algun diya se amatan. Durante todo el tiempo ke briyan, se aboltan para ariva. No emporta la direksyon de la kandela; las senteyas de las flamas mos akodran la flakeza de la vida. Una vida kerida. 

Kuando asyendo mis kandelas de Shabat me akodro de la luz de este mundo, ke es difisil de apersivir en el kurso de la vida de kada diya. I kuando paso mis manos ensima de las puntas de las flamas es ke siento la kalor de muestra alma ke mos adjunta a todos. Tanbien kuando asyendo mis kandelas penso a todas las mujeres ke las asendyeron antes de mi, mismo en tiempos mas areskuras de muestra istorya. I kuando penso a eyas, realizo ke no esto sola i ke ago parte de esta grande erensya ke es una luz entre las nasyones.

Alora este Shabat i todos los otros Shabates biveremos esta erensya i seyamos esta luz. 

 

 

 

 

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın

İLGİLİ HABERLER

İLGİNİZİ ÇEKEBİLİR

GS3

Tünelin Ucu-İzel ROZENTAL

Tünelin Ucu-İzel ROZENTAL

Mozotros Ailesi- İrvin Mandel

Mozotros Ailesi- İrvin Mandel