24 Ekim 2020 Cumartesi 23:36

Los djudios de Buttonwood

Metin DELEVİ Judeo-Espanyol 1567 görüntüleme
20 Mayıs 2020 Çarşamba

El akordo de Buttonwood es el dokumento fundador de lo ke oy es la Borsa de Nueva York i es uno de los dokumentos finansyeros mas importantes en la istorya de los Estados Unidos. Este akordo  organizo el komersyo de valores finansyeros en la sivdad de Nueva York i se firmo el 17 de Mayo de 1792 entre 24 korredores de borsa delantre de No. 68 Wall Street. (Ande se topa oy en diya la Borsa de Nueva York).  Segun la lejenda, la firma se realizo debasho de un arvole, platanus occidentalis, un platano (Buttonwood en Inglez), ma es posivle ke este arvole nunka egzistyo! La Borsa de Nueva York selebra la firma de este akordo komo su fundasyon. 

En rezumen, el akordo teniya dos artikolos:

1) los korredores deviyan tratar solo entre eyos, eliminando ansi los subastadores temporales, 

2) las komisyones van a ser  0.25% del montante de la tranzaksyon. 

Los 24 korredores ke sinyaron el akordo de Buttonwood eran: Peter Anspach, Armstrong & Barnewall, Andrew D. Barclay, Samuel Beebe, G. N. Bleecker, Leonard Bleecker, John Bush, John Ferrers, Isaac M. Gomez, John A. Hardenbrook, Ephraim Hart, Bernard Hart, John Henry, Augustine H. Lawrence, Samuel March, Charles McEvers Jr., Julian McEvers, David Reedy, Robinson & Hartshorne, Benjamin Seixas, Hugh Smith, Sutton & Hardy, Benjamin Winthrop, Alexander Zuntz. 

Komo estash imajinando i asperando, 5 de los korredores, kaji el kuarto de los fundadores de la famoza Borsa en Wall Street eran djudios. I todos eran myembros de la komunidad Shearith Israel de Nueva York. Los konoseremos…

Isaac Moisés Gómez (1768-1831) era orijinaryo de Nueva York, komo su padre Moises Gomez (1728-1789). Isaac en realidad eskrivyo una istorya detayada jenealojika ke trasa la famiya Gomez asta un noble konverso espanyol, tanbyen yamado Isaac Gomez, ke perdyo todo en fuyendo de la Enkizisyon Espanyola. Luis Moises Gomez, ijo de Isaac el Espanyol, se engrandesyo en Fransya, ma resivyo permeso de la Ingleterra para vinir i instalarse en las koloniyas muevas, ande fraguo Gomez Mill House ande es oy Marlboro, Nueva York (La abitasyon djudia la mas vyeja de Amerika del Norte). Isaac Gomez, ke sinyo el akordo de Buttonwood, se kazo kon Abigail Lopez de Newport, Rhode Island, i tuvo 10 ijos. 

Bernard Hart (1763-1855) nasyo en Londra i emigro a la Amerika aldoredor de 1777. Kazado dos vezes, el uniko ijo de su primer matrimonyo fue Bret (Francis Brett) Harte (1836-1902), un popular eskrivano i poeta. La segunda espoza de Hart era la ija de Benjamin Seixas, i uno de sus ijos, Emanuel Bernard Hart, sirvyo en el Kongreso de los Estados Unidos en los anyos 1851-1853.

Ephraim Hart (1747-1825) nasyo en Furth, Almanya, ande se yamava Hirz. Se save ke estuvo en la Amerika durante la Gerra Revolusyonarya porke sovre su tomba esta eskrito ke era soldado  debasho del Kapitan Henry Graham. En la dekada de 1770, Hart paso un tyempo en Filadelfiya, ande era myembro de la Kongregasyon Mikveh Israel. Kuando torno a Nueva York, se izo myembro aktivo de la Kongregasyon Shearith Israel.

Benjamin Mendes Seixas (1747-1817) nasyo en Newport, Rhode Island i su famiya i ermanos eran  muy famozos. Gershom Mendes Seixas era el lider spiritual de Shearith Israel. Moises fundyo el Rhodes Island Bank i eskrivyo una letra a George Washington kuando fue elijido, lo ke resulto en la famoza repuesta prezidensyal a los djudios de Newport: “Ke los ijos de la povlasyon de Abraham, ke biven en esta tyerra, van a kontinuar a mereser la buena voluntad de los otros abitantes”. 

Sovre Alexander Zuntz (1742-1819) se topa pokos dokumentos.  Nasido en Westfalia (Alemania), vino a Amerika komo un pirata konraktado por los britanikos. Arivando a la Amerika se fuyo de la armada i se kedo en los Estados Unidos, ande se izo un merkader muy reushido. Era myembro aktivo de Shearith Israel.

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın

İLGİLİ HABERLER

İLGİNİZİ ÇEKEBİLİR